Gjendja e Julian Ryerson po shqetëson Borussia Dortmundin. Norvegjezi ishte titullar në ndeshjen e Ligës së Kampionëve në mesjavë kundër Barcelonës, të cilën verdhezinjtë e humbën 3-2, por u zëvendësua në pushimin mes dy pjesëve. Në atë moment, klubi raportoi se lojtari kishte pasur probleme me frymëmarrjen.
Megjithatë, në orët në vijim, klubi nuk publikoi asnjë raport mjekësor, dhe sipas gazetës gjermane ‘BILD’, arsyeja e zëvendësimit kundër katalanasve është edhe më serioze: mbrojtësi, sipas burimeve të gazetës, kishte humbur ndjenjat në dhomën e zhveshjes gjatë pushimit dhe u desh të transportohej me ambulancë në spital pas takimit të zhvilluar në ‘Signal Iduna Park’.
Lojtari iu nënshtrua disa ekzaminimeve mjekësore për të kuptuar më shumë rreth incidentit dhe shkakun e tij. Fundjavën e kaluar, Ryerson nuk ishte i përfshirë në listën e lojtarëve për ndeshjen kundër Hoffenheimit, dhe pjesëmarrja e tij në ndeshjen kundër Wolfsburgut mbetet ende në dyshim.
