Ai është truri i ofensivës së rebelëve islamikë në Siri!
Abu Muhammad al-Jaulani, 42 vjeç, i lindur në Riad (Arabia Saudite), drejton milicinë anti-Assad, Hai’at Tahrir ash-Sham (HTS) në Siri.
Brenda një periudhe shumë të shkurtër kohore, ai arriti të vinte nën kontrollin e tij jo vetëm qytetin e dytë më të madh të vendit, Alepon, por edhe pjesë të mëdha të Sirisë veriperëndimore.
Një kryengritje surprizë që i sjell shumë vëmendje atij.
Kush është njeriu, të cilit i frikësohet diktatori i Sirisë, Bashar al-Assad, i konsideruar si femohues nga Shteti Islamik (IS) dhe i kërkuar nga SHBA-të me një shpërblim për kokën e tij?
Abu Muhammad al-Jaulani (al-Jaulani është emri i tij i luftës) lindi dhe u rrit në kryeqytetin e Sirisë, Damask. Familja e tij vinte nga Lartësitë Golan, të cilat Izraeli i pushtoi nga Siria në 1967.
Shtëpia e prindërve të tij: nacionalistë arabë dhe anti-izraelitë.
Kur ishte adoleshent, al-Jaulani u radikalizua. Në vitin 2003, ai iu bashkua grupit terrorist al-Kaeda në Irak. Ai kaloi pesë vjet atje në burgjet e SHBA – duke përfshirë famëkeqin Abu Ghraib. Në vitin 2011, ai u kthye në Siri dhe u bë një figurë kyçe në krahun sirian të Al-Kaedës: Frontin al-Nusra.
Misioni i tij: eliminimi i Assad-it dhe rrëzimi i regjimit!
Për ta bërë këtë, ai detyroi liderin e IS, Abu Bakr al-Baghdadi, ta furnizojë me para dhe luftëtarë. Por al-Jaulani këmbëngul se ai kurrë nuk e ka mbështetur xhihadin global – Amerika dhe Evropa nuk kanë asgjë për t’u frikësuar nga luftëtarët e tij. Në vitin 2013, ai u nda me IS dhe tre vjet më vonë u nda edhe nga Al-Kaeda.
Ky qëndrim i jep atij reputacionin e të qenit më i moderuar. Por al-Jaulani ka qenë në të gjitha listat terroriste të Perëndimit për vite me radhë. Shtetet e Bashkuara ofrojnë 10 milionë dollarë për informacionin që çon në arrestimin e tij.
Arsyeja: sulmet terroriste kundër civilëve në Siri gjatë luftës civile dhe një masakër në fshatin Druze në rajonin e Idlib në vitin 2015, të cilat i atribuohen Frontit Al-Nusra.
Al-Nusra u bashkua në aleancën HTS anti-Assad në vitin 2017. Por nuk mund të flitet për kushte demokratike në zonat që mban nën kontroll: HTS thuhet se ka torturuar të burgosurit në burgjet e saj, ka caktuar dënime me vdekje për civilët dhe ka shtypur protestat. Thuhet se al-Jaulani po bëhet gjithnjë e më autokratik.
Çfarë mund të pritet nga ky njeri nëse Assad rrëzohet?
Al-Jaulani i udhëzoi zyrtarisht luftëtarët e tij që t’i trajtonin njerëzit e Aleppos të pushtuar me “mëshirë, mirësi dhe butësi”. Qyteti ka një histori të gjatë të diversitetit kulturor dhe fetar. Shumë të krishterë jetojnë ende atje.
Është e diskutueshme nëse ai do ta mbajë këtë premtim. “Al-Jaulani mund të ketë braktisur disa nga ideologjitë e tij radikale,” tha eksperti për Sirinë, Fabrice Balanche. “Por ka më shumë gjasa që ai të fshehë qëllimet e tij të vërteta”. (BILD)
