Më pak se një muaj para zgjedhjeve të përgjithshme në Gjermani, një sondazh ka gjetur se mbështetja për socialdemokratët e qendrës së majtë të kancelarit Olaf Scholz (SPD) ka rënë ndjeshëm, ndërsa ”Alternativa për Gjermaninë” (AfD) e ekstremit të djathtë ka shënuar fitime të konsiderueshme.
Sipas sondazhit të së mërkurës YouGov, SPD ka rënë me katër pikë në 15% krahasuar me javën e kaluar. AfD u rrit me të njëjtën shumë në 23%, gjë që do ta bënte atë forcën e dytë më të fortë pas aleancës konservatore CDU/CSU me 29%.
Sondazhe të tjera tregojnë se CDU/CSU arrin 30% ose më shumë. Të gjelbrit dhe ”Demokratët e Lirë” pro biznesit (FDP) panë gjithashtu rënie të mbështetjes, me të parën tani në 13% dhe FDP nën pragun e 5% që zakonisht nevojitet për të hyrë në Bundestag.
Sondazhi u krye nga 24-27 janar, disa ditë pasi një burrë dhe një djalë i ri u vranë në një sulm me thikë në Bavari. I dyshuari për vrasjet është një shtetas afgan 28-vjeçar, kërkesa e të cilit për të qëndruar në Gjermani ishte refuzuar.
Pas sulmit, kreu i opozitës së qendrës së djathtë, Friedrich Merz tha se blloku CDU/CSU do të shtyjë për të shtrënguar politikën e migracionit, me votime për dy mocionet që priten sot në Bundestag.
Çështja e migrimit është tani një temë e rëndësishme për 36% të të anketuarve, nga 23% një javë më parë. Gjermania shkon në zgjedhje më 23 shkurt pas rënies së koalicionit trepartiak të Scholz në nëntor.
