Drejtuesi Politik i Partisë Socialiste, Taulant Balla, u prit nga Kevin Coleman, Kryetar i Bashkisë Westland, ku jetojnë afro 12 mijë bashkatdhetarë.
“Jemi këtu për diasporën tonë që jeton në Miçigan. Jemi shumë krenarë për nivelin e tyre të integrimit në shoqëri. Shteti i Miçiganit ka qenë një ndër shtetet më të dashura të shqiptarëve 100 vitet e fundit. Kam vizituar teqe, kisha, dhe sapo erdha nga takimi me Elon Musk-un shqiptar. Po takojmë shumë sipërmarrës të suksesshëm dhe përfundoj sot me një takim me diasporën shqiptare,” i tha Balla kryebashkiakut të Westland, duke i shpjeguar atij se si gjysma e popullsisë së Shqipërisë jeton jashtë kufijve, me një komunitet të madh edhe në SHBA.
Më lejoni t’ju shpreh në emër të qeverisë dhe popullit tonë falënderimet e sinqerta për atë që po bëni për të ndihmuar bashkëqytetarët tanë që jetojnë këtu i tha Balla kryebashkiakut.
Kryebashkiaku i Westland, Kevin Coleman, nga ana e tij i tha Ballës se vlerëson bashkëpunimin dhe miqësinë mes shtetit të Miçiganit dhe Shqipërisë.
“Është shumë e rëndësishme për ne. Ka qenë gjithmonë një marrëdhënie e veçantë. Qyteti im i Westland është shtëpia e disa mijëra shqiptaro-amerikanëve, është një pjesë e bukur e kulturës sonë. Ata zotërojnë biznese gjithashtu, restorante, kompani. Marrëdhënia mes tyre dhe qeverisjes sonë këtu në këtë qytet ka qenë shumë e fortë,” u shpreh Coleman, i cili i tregoi Ballës edhe një rezolutë që përcaktonte datën 28 nëntor si Ditën e Trashëgimisë Shqiptare.
Coleman ishte nismëtari i kësaj rezolute.
“Është mahnitëse, përmes kësaj rezolute ju keni pranuar kontributin e komunitetit shqiptar këtu për shtetin e Miçiganit. Është një ide madhështore dhe e bukur,” u shpreh Balla, duke treguar se ekziston diçka e ngjashme edhe në Nju Jork.
Në fund shkëmbyen dhuratat. Balla i dhuroi një peizazh të qytetit të Beratit duke i thënë se kur të vizitojë Shqipërinë do ta shoqërojnë edhe në atë qytet, ndërsa kryebashkiaku një kapelë me logon e qytetit dhe një filxhan me simbole kuqezi.
