Menjëherë titullar dhe menjëherë vendimtar. Pas golit në sfidën e tij debutuese, Randal Kolo Muani konfirmohet edhe njëherë si përforcimi perfekt i merkatos së janarit pasi gjen sërish rrugën e rrjetës dhe ketë herë futet menjëherë në historinë bardhezi.
Kolo Muani shënoi një dopietë ndaj Empolit duke kthyer i vetëm rezultatin pas golit të De Shiljos që vendosi në vështirësi Juventusin. Kolo Muani fillimisht shënoi një gol pas një dueli fizik të fituar me mbrojtjen kundërshtare e më pas devijoi me fat një goditje të Ueah me topin që përfundoi në rrjetë. 2 ndeshje 3 gola.
Si ai, në historinë e Juventusit ka arritur të bëjë vetëm një tjetër lojtarë. Bëhet fjalë për Karlos Tevezin i cili ka shënuar në të dyja ndeshjet e tij të para me “Zonjën e Vjetër” në vitin 2013. Megjithatë, në debutimin e tij në shtëpi në Serinë A, Kolo Muani shënon një dopietë. Ky është një rekord absolut nga ana e tij duke qenë së askush më parë te Juventusi nuk kishte shënuar dopietë në sfidën e tij debutuese në Torino. Kolo Muani është kthyer menjëherë vendimtar nën urdhrat e Tiago Motës duke ulur madje në stol edhe Dushan Vlahoviçin që shihej si një lojtar i pazëvendësueshëm pak kohë më parë.
Pas sfidës, sulmuesi francez nuk kishte si të mos shfaqej i lumtur. Golat e tij përmbysën sfidën delikate ndaj Empolit, duke hequr më pas edhe presionin nga Juventusi. Ai u shpreh se është shumë i lumtur me shokët e skuadrës, duke iu referuar këtu mbi të gjitha Kenan Jildizit, i cili ishte pranë tij gjatë intervistës për mediat.
“Jemi të lumtur bashkë. Donim të fitonim përballë tifozëve tanë. Jemi të lumtur dhe objektivi jonë është që të vazhdojmë të fitojmë”, u shpreh fillimisht Kolo Muani për DAZN.
“Është diçka e jashtëzakonshme dhe shumë e bukur të jesh këtu. Kemi fituar dhe tashmë duhet që të vazhdojmë të festojmë për këtë triumf. Jildiz është një lojtar i madh dhe shumë teknik. Është i ri, por është bukur që të luash bashkë me të”, tha ndër të tjera Kolo Muani, i cili u shpall gjithashtu edhe lojtari i ndeshjes në triumfin 4-1 kundër Empolit.
Kolo Muani u afrua pak javë më parë në formë huazimi nga PSG-ja, por duket sikur është përshtatur menjëherë me ambientin në Torino.
