Kombëtarja shqiptare ka realizuar sot pasdite seancën e parë stërvitore në ambientet e “Shtëpisë së Futbollit” në kuadër të përgatitjeve për ndeshjet e ardhshme ndaj Anglisë dhe Andorrës në kualifikueset për Kampionatin Botëror 2026.
Sipas Departamentit të Komunikimit të FSHF, të gjithë 26 lojtarët e grumbulluar janë bashkuar me ekipin, ndërkohë që të fundit që mbërritën në grumbullim, iu bashkuan skuadrës gjatë seancës stërvitore. Grumbullimi i lojtarëve ka përfshirë edhe disa futbollistë nga kampionati “Abissnet Superiore”, të cilët u ftuan nga trajneri Silvinjo për t’u bashkuar me ekipin gjatë kësaj seance.
Stërvitja e sotme ishte një kombinim i ushtrimeve në palestër dhe aktiviteteve në fushë, duke i dhënë mundësinë lojtarëve të zhvillojnë aftësitë e tyre fizike dhe taktike për sfidat që i presin.
Pas përfundimit të seancës, ekipi do të udhëtojë drejt Londrës të mërkurën, për t’u përgatitur për ndeshjen e parë kualifikuese për Kupën e Botës 2026 ndaj Anglisë, që do të zhvillohet të premten në legjendaren “Wembley”. Kombëtarja shqiptare ka si objektiv të fillojë këto kualifikime me një rezultat pozitiv për të shtuar shpresat për një kualifikim në turneun më të madh futbollistik në botë.
