Një gjykatë amerikane ka urdhëruar që dosjet e imigracionit të Princit Harry duhet të bëhen publike deri të martën. Gjykatësi i qarkut Carl Nichols urdhëroi lëshimin e dokumenteve bazuar në një kërkesë për lirinë e informacionit (FOI) nga Fondacioni Heritage, një institut konservator amerikan në Uashington DC.
Fondacioni pretendon se princi fshehu përdorimin e drogës në të kaluarën, gjë që duhet ta kishte skualifikuar atë nga marrja e një vize amerikane. Akuzat përqendrohen rreth pretendimeve të Dukës së Sussex në kujtimet e tij “Spare”, ku ai iu referua marrjes së kokainës, marihuanës dhe kërpudhave psikodelike. Në librin e botuar në janar 2023, Princi Harry shkroi se për herë të parë provoi kokainën në moshën 17-vjeçare.
“Nuk ishte shumë argëtuese dhe nuk më bëri veçanërisht të lumtur, pasi dukej se i bënte të gjithë rreth meje, por më bëri të ndihesha ndryshe, dhe ky ishte qëllimi kryesor”, shtoi ai. Ai gjithashtu shkroi për përdorimin e marihuanës, duke thënë se “kokaina nuk bëri asgjë për mua”, por “marihuana është ndryshe, që në të vërtetë më ndihmoi”.
Formularët e aplikimit për viza amerikane pyesin në mënyrë specifike për përdorimin aktual dhe të kaluar të drogës. Pranimet e përdorimit të drogës mund të çojnë në refuzimin e aplikimeve për viza jo-imigruese dhe imigruese, megjithëse oficerët e imigracionit kanë lirinë për të marrë një vendim përfundimtar bazuar në faktorë të ndryshëm, shkruan BBC.
Fondacioni Heritage pretendon se Princi Harry gënjeu për përdorimin e tij të drogës tek autoritetet amerikane të imigracionit, gjë që mund të çojë në një ndalim të përjetshëm nga Shtetet e Bashkuara.
Vendimi i gjykatës vjen pas një vendimi të vitit 2024 nga i njëjti gjykatës, i cili tha se nuk kishte interes të mjaftueshëm publik për të zbuluar të dhënat e imigracionit të Princit Harry. Fondacioni Heritage e kundërshtoi atë vendim dhe kërkoi që vendimi të ndryshohej.
Princi Harry u transferua në SHBA me gruan e tij Meghan në vitin 2020 pasi u largua nga Britania dhe postet e tij mbretërore. Nuk dihet se me çfarë vize ka hyrë ai në vend, ndërkohë që dukesha është shtetase amerikane.
Presidenti Donald Trump më parë përjashtoi mundësinë e deportimit të Princit Harry në shkurt, duke thënë për New York Post “Do ta lë të qetë… Ai ka mjaft probleme me gruan e tij. Ajo është e tmerrshme”. Meghan ka qenë një kritike e zëshme e Trump në të kaluarën, duke e etiketuar atë si “mizogjinist”.
