Carlo Ancelotti është sërish favorit për të marrë postin vakant të trajnerit të Brazilit. Sipas informacioneve të publikuara nga ESPN Brasil, Federata Braziliane e Futbollit (CBF) shkarkoi trajnerin Dorival Júnior muajin e kaluar dhe kishte konsideruar Jorge Jesus, trajnerin aktual të Al Hilal, si një zëvendësues të mundshëm, por “Carletto” ka qenë prej kohësh zgjedhja numër një.
Në udhëkryq…
Sidomos për presidentin e Federatës së Futbollit të Brazilit, Ednaldo Rodrigues, pasi Tite dha dorëheqjen pas Botërorit 2022. Edhe pse Ancelotti e ka përsëritur publikisht dëshirën e tij për të qëndruar në Real Madrid, pozicioni i tij është nën presion të madh pas eliminimit nga Champions League. Los Blancos aktualisht janë duke konkurruar për La Liga dhe Kupën e Mbretit, me kompeticionin e fundit që është fokusi i CBF. Arsyeja? Në rast humbjeje, Ancelotti mund të shkarkohet.
Jo vetëm një interes…
Sipas ESPN, megjithatë, bisedimet midis përfaqësuesve të Federatës Braziliane të Futbollit dhe rrethit të Ancelottit kanë rifilluar javët e fundit: një agjent dhe dy ndërmjetës brazilianë janë në Madrid dhe, përveç dërgimit të raporteve të përditshme, ata kanë pasur diskutime me Davide Ancelottin, djalin dhe ndihmës-trajnerin e Realit. Por derisa të sqarohet e ardhmja e ish-trajnerit të Milanit, asnjëra palë nuk do të marrë një vendim përfundimtar.
Afati i fundit…
Qëllimi i presidentit të CBF, Rodrigues është të emërojë trajnerin e ri të Brazilit në javët e ardhshme, përpara thirrjes së planifikuar për 26 maj për kualifikueset e Kupës së Botës në qershor. Ndërkohë, sa i përket kandidaturës së Ancelottit si trajner, Vinicius Junior dhe Rodrygo, që tashmë luajnë me të te Real Madrid, do të mirëprisnin ardhjen e trajnerit italian në krye të kombëtares. Alternativa e mundshme mbetet Jorge Jesus.
