Nuk do të kalojnë pa u vënë re dhe me siguri do të hapin debat deklaratat e forta të Felipe Melo-s, i cili gjatë një paraqitjeje në emisionin “Seleção Sportv” në kanalin brazilian SportTV, është rikthyer te periudha e tij tek Juventusi, duke zbuluar një prapaskenë që përfshin legjendën italiane Gianluigi Buffon dhe marrëdhënien e tij me bastet.
“E di që është një temë e ndjeshme sepse do të them diçka që pak njerëz e dinë. Kur luaja për Juventusin, qëndronim në një hotel në Torino që ndodhej në një qendër tregtare, ku kishte edhe kinema,” – tregoi mesfushori brazilian.
“Shkonim në kinema dhe Buffon vendoste baste… Ulej para kompjuterit ose kishte me vete iPad-in e tij, dhe vendoste baste.
Më pyeste: ‘Mik, çfarë mendon për këtë ndeshje në Serinë C të Brazilit?’ Vendoste bast dhe fitonte shumë para, por më pas humbiste po aq shumë.
Dhe nuk ishte vetëm ai, kishte edhe të tjerë që më pyesnin.”
Deklarata tronditëse që hedh dritë mbi një aspekt të panjohur deri tani të jetës jashtë fushe të ish-kapitenit të Juventusit dhe përfaqësueses italiane.
Edhe pse që prej disa kohësh është folur për një problem të Buffonit me bastet, në një intervistë për TG1 në nëntorin e kaluar, legjenda e portës kishte mohuar kategorikisht se kishte vendosur ndonjëherë bast mbi futbollin – një praktikë që ndalohet rreptësisht dhe që do ta kishte dënuar me përjashtim nga aktiviteti sportiv.
“Ka qenë një dobësi imja, deri kur gjeta qendrën time. Për disa është ves. Për mua ishte adrenalinë,” – kishte thënë Buffon në prag të publikimit të autobiografisë së tij “Të biesh, të ngrihesh, të biesh, të ngrihesh”.
“Për një gjë jam i sigurt: nuk kam bërë kurrë asgjë të paligjshme.
Nuk kam qenë kurrë nën hetim, nuk kam marrë kurrë ndonjë njoftim nga prokuroria. Sepse nuk kam vendosur kurrë bast mbi Juventusin, Kombëtaren apo ndonjë ndeshje futbolli.
Kam vendosur gjithmonë vetëm mbi basketbollin amerikan dhe tenisin.”
Rrëfimi i Felipe Melo-s, në kontrast me deklaratat e Buffonit, pritet të shkaktojë reagime të shumta në botën e sportit dhe opinionin publik italian.
Ende mbetet për t’u parë nëse do të ketë ndonjë reagim zyrtar nga Buffon, Juventusi apo autoritetet përkatëse.
