Që nga viti 2013, Partizani ka hyrë në një epokë të re, që duhet thënë se është vepër e presidentit Demi, i cili i ka garantuar klubit siguri financiare dhe ka investuar në rikthimin e infrastrukturës dhe ndërtimit të një stadiumi privat.
Me rikthimin në Kategorinë Superiore, Partizani ka arritur të regjistrojë një ecuri mbresëlënëse në derbi. Të kuqtë bënë historinë e ndeshjeve kundër Tiranës, duke regjistruar një ecuri prej afro gjashtë vitesh pa humbur derbin. Edhe aktualisht janë në një ecuri shumë të mirë, pasi kanë hyrë në vitin e tretë pa humbur derbin. Fitorja e fundit e Tiranës kundër Partizanit është në tetor 2022. Që atëherë janë luajtur edhe 10 derbe dhe janë mbyllur me fitoren e Partizanit ose në barazim. Por le të merremi pak me trajnerët dhe rezultatet e tyre kundër Tiranës.
TË PAMPOSHTURIT – Në 11 vitet e fundit te Partizani, një numër i madh trajnerësh kanë dalë të pamposhtur nga derbet me Tiranën. Ata janë Marcio Sampaio (1 ndeshje), Shpëtim Duro (4 ndeshje), Sulejman Starova (5 ndeshje), Andrea Agostineli (2 ndeshje), Orges Shehi (2 ndeshje), Aleksandar Veselinoviç (3 ndeshje), Arbër Abilaliaj (2 ndeshje) dhe trajneri aktual Skënder Gega (4 ndeshje), i cili të hënën do të zhvillojë derbin e radhës. Sa u përket të pamposhturve duhet thënë se Starova mbetet rekordmeni me pesë ndeshje, i ndjekur nga Gega dhe Duro me nga katër. Ecurinë perfekte e ka vetëm Shehi me dy fitore në dy ndeshje në total. Tropojani luan derbin e pestë, këtë herë me një skuadër krejt tjetër, ku do të kërkojë të ruajë pathyeshmërinë. I vetmi trajner që ka luajtur më shumë se katër derbe pa u shkëputur nga stoli është Ilir Daja. Tiranasi është i vetmi trajner që ka qëndruar te Partizani edhe në sezonin pasardhës pasi është emëruar. Të gjithë të tjerët, edhe në dy rastet kur kanë fituar titullin (Gega dhe Kolela), janë larguar pas një sezoni ose më pak.
PA SUKSES – Trajnerët e Partizanit që nuk e kanë fituar asnjëherë derbin janë Adolfo Sormani, Dritan Mehmeti dhe Aleksandar Veselinoviç. Italiani ka drejtuar skuadrën në dy periudha të ndryshme në sezonet 2016-2017 dhe 2019-2020. Në tri derbi të drejtuara, ai ka barazuar dy dhe ka humbur një. Kjo humbje përkon me një nga rezultatet më të thella të historisë, 5-1, në vitin 2019. Mehmeti drejtonte në një sezon të vështirë dhe barazonte një derbi, para se të humbte të dytin. Veselinoviç e la Partizanin me dy barazime pa gola.
