Nga Ylli Manjani
E përshëndes Fredin që u distancua nga vendimi absurd i GJKKO për të mbajtur në këmbë një hetim PA FAKT PENAL ndaj Artan Gaçes dhe Olta Xhaçkës. Jam plotësisht dakord me shqetësimin e tij madje, që Himariotët të marrin sa më parë çertifikatat reale të pronave.
Por vetë Olsi Dado, prokurori “hero i fëmijëve të PD-së” ka arritur në konkluzionin llogjik se nuk ka fakt penal ndaj çiftit Gaçe-Xhaçka.
Megjithatë gjykata, formalisht brenda kompetencës absurde që i njeh ligji hajvan i reformës, ka urdhëruar të hetohet ende.
Tani çfarë është rasti i Gaçes me dy fjalë?
Kompania e Gaçes ka blerë një copë tokë diku në Dhërmi për të ndërtuar një hotel. Pra e ka BLERË, me para të thata sipas ligjit civil të shitblerjes dhe, siç blejmë të gjithë ne. Meqë i është dashur më shumë tokë, ka hyrë bë tratativë me pronarët e tokës fqinje, të cilët nuk kanë dashur ta shesin, por janë dakordësuar që ta japin me përqindje në kontratë sipërmarrje.
Pra pa asnjë lidhje, po me zero lidhje me statusin e Investorit Strategjik që debatohet rëndom, kompania e Gaçes ka marrëdhënie kontraktore civile me shtetas të thjeshtë.
Mbi këtë bazë, kompania ka aplikuar për leje ndërtimi dhe me lejen e marrë ka ndërtuar karabinanë e hotelit. Ndërtimin e ka bërë me paratë e veta 100%.
Në një moment të caktuar, kur po punohej, del debati ligjor se personat që shitën tokën dhe ata që lidhën kontrata sipërmarrje nuk ishin pronarë të tokës, por me zhvendosje kufinjsh gjendeshin padrejtsisht në atë tokë. Ky është kallëzimi i Fredi Belerit
Gjykata penale (GJKKO) krahas hetimit penal për bashkinë e Himarës vendos të sekuestrojë edhë tokën ku po ndërtohet hoteli. Pra kujdes, tokën jo hotelin.
Hetimet përfundojnë dhe ngrihet akuzë për zyrtarët e bashkisë që kanë bërë zhvendosjen e kufinjve, akuzë e cila u gjykua në GJKKO.
Ndërkohë prokurori sqaron në gjyq dhe me shkrim çara kallëzuesit Beleri, se për Gaçen nuk ka fakt penal, sepse ai është në mosmarrëveshje civile me ata që iu paraqiten si pronarë të tokës. Konkluzioni i Dados është i drejtë dhe i provuar pas hetimeve të të tmerrshmit SPAK.
Në përpjekje për të kërkuar që të lejohet puna në kantier, sepse ndërtimi nuk është nën sekuestër, GJKKO e Apelit i këput një vendim pezhorativ (përkeqësues) ku gati sa s’thotë merrini edhe leckat e trupit. Ata që kuptojnë ligjin e dinë se Apeli është pezhorativ vetëm kur kërkon prokurori jo kur apelon pala.
Fill pas kësaj, GJKkO e shkallës së parë urdhëron hetime për Gaçen dhe për Xhaçkën. Nuk po analizoj këtu konfliktin e interesit potencial të familjarëve të gjykatës me detyrën e zonjës Xhaçka, sepse këtë e denoncon edhe vetë Fredi Beleri në distancimin e Tij.
Ky është shkurt rasti.
Tani, kriminalizimi me çdo kusht i veprimeve kontraktore e juridiko-civile të cilat të gjithë ne i bëjmë nuk është as drejtësi e as garanci juridike.
Urrejtja politike ndaj Xhaçkës apo Gaçes nuk mund të jetë motiv për drejtësinë, sepse përndryshe e bën atë persekutore politike.
Sa i takon debatit mbi përfitimin si investitor strategjik, ai fillon ditën kur:
Gaçe ta ketë mbaruar hotelin;
të ketë marrë plazhin para hotelit me kontratë nga bashkia; në atë plazh të ketë fitime dhe kompania të ketë ndarë këtë fitim (nga plazhi pra) si divident; dhe nëse deri atëherë Gaçe dhe Xhaçka janë burrë e grua.
Tani doni ti shani, bëjeni, por mos na hapni barkun me arsyetime koti jo po ligji, jo po hetimi, jo po statusi etj.
****
Sot vendosa të mbroj Artan Gaçen “oligarkun” tjetër. E bëj se më do ai… qejfi dmth.
Dhe sa për info, kushdo që ka jetuar në Tiranën e viteve ’90 dhe i ka rënë rruga te bulevardi Zogu i parë (atëherë quhej rruga e Trenit) do ketë parë Butik Firencen. Ajo ka qenë e Tan Gaçes.
Pra zotëria ka qenë në biznes shumë përpara se ne të dinim që ekziston Olta Xhaçka apo të paramendonim se Edi Rama do ishte kryeministër.
Në qoftë se të bësh biznes quhet korrupsion, u rujt zoti o njerëz!
