Kim Jong Un ka zbuluar një shkatërrues të ri detar që me sa duket mund të lëshojë raketa balistike me aftësi bërthamore.
Sipas mediave të huaja, udhëheqësi i Koresë së Veriut thotë se anija luftarake është një përparim i rëndësishëm drejt qëllimit të tij për të zgjeruar gamën operacionale dhe aftësitë e sulmeve parandaluese të ushtrisë së tij.
Kim thotë se akumulimi i vazhdueshëm i armëve nga vendi i tij është një përgjigje ndaj kërcënimeve të perceptuara nga SHBA dhe aleatët e saj në rajon, të cilët kanë mbajtur stërvitje ushtarake.
Ai u zotua të “përgjigjet me vendosmëri ndaj kësaj krize gjeopolitike dhe zhvillimeve të vazhdueshme”, sipas fjalimit të tij të transmetuar nga agjencia shtetërore e lajmeve KCNA.
Shkatërruesi i ri “shumëfunksional”, me peshë 5,000 ton, u reklamua si i pari në një klasë të re anijesh luftarake të armatosura rëndë. Është e pajisur me “armët më të fuqishme” dhe është ndërtuar “brenda 400 ditëve”, citohet të ketë thënë Jo Chun Ryong, një sekretar në Partinë e Punëtorëve në pushtet.
Anija luftarake është projektuar për të trajtuar sisteme të ndryshme të armëve, duke përfshirë armët anti-ajrore dhe anti-detare, si dhe raketa balistike dhe të lundrimit me aftësi bërthamore, sipas zotit Kim.
Një nëndetëse me energji bërthamore do të ishte hapi tjetër i madh në forcimin e marinës së tij, shtoi lideri i Koresë së Veriut. Disa ekspertë kanë vënë në dyshim nëse kombi i fshehtë dhe i varfër mund të zhvillojë aftësi të tilla të avancuara pa ndihmën e huaj.
Tensionet rajonale janë rritur pasi Koreja e Veriut vazhdon të shfaqë aftësitë e saj ushtarake, duke ndihmuar gjithashtu Rusinë në luftën e saj në Ukrainë.
