Në Angli, futbolli elitar ndodhet në raundin e 32-të dhe këtë të diel (13 prill) Liverpooli ka bërë një tjetër hap të rëndësishëm drejt titullit kampion. Sukses edhe për Wolves, që duket se nuk e pati të vështirë kundër Tottenham. Ndërkohë që Chelsea ngeci në barazimin 2-2 në shtëpi.
Në “Anfield”, vendasit e Liverpool fituan 2-1 kundër West Ham për të “prekur” titullin e 20-të kampion në Premier League. Sfida u zhbllokua pas 18 minutave lojë, kur asisti i Salah u shfrytëzua mirë nga Diaz. Fundi i ndeshjes ishte dramatik dhe miqtë barazuan me autogolin e Robertson. Për të qetësuar Arne Slot mendoi bashkëkombasi i tij dhe kapiteni i të kuqve, van Dijk, që një minutë nga fundi i ndeshjes shënoi golin e tri pikëve. Pas kësaj sfide Mohamed Salah vendosi edhe një rekord, duke u bërë futbollisti i vetëm që në një sezon të Premier League përfshihet në 45 gola, me 27 realizime personale dhe 18 asiste.
Në “Stamford Brigde” Chelsea dhe Ipswich barazuan 2-2. Duket se Blutë e Marescas nuk dinë të fitojnë dhe ndalen sërish në barazim. Ishin miqtë që shënuan dy gola në pjesën e parë me Enciso dhe Johnson, para se autogoli i Tuanzebe dhe Sancho të fiksonin shifrat në 2-2. Chelsea mbetet në vendin e pestë me 54 pikë, ndërsa Ipswich duket se ka ‘larë duart’ me Premier League.
Në “Molineux” vendasit e Wolves “kafshuan” Tottenhamin dhe e mposhtën 4-2 për të ritheksuar se Spurs janë në krizë të madhe. Ait Nouri, autogoli i Spence, Larsen dhe Cunha shënuan për Wolves, teksa Spurs shkurtuan me Tel dhe Richarlison.
Premier League, raundi 32:
E diel, 13 prill 2025
15:00
Chelsea 2-2 Ipswich
Liverpool 2-1 West Ham
Wolves 4-2 Tottenham
17:30 Newcastle – Manchester United
