Thomas Müller do të largohet nga Bayern Munchen në fund të këtij sezoni.
Lajmi po qarkullonte prej disa ditësh, por sot ka ardhur zyrtarizimi. Sulmuesi gjerman publikoi një mesazh përmes faqes zyrtare të klubit, duke përmendur edhe objektivat e radhës për bavarezët, si finalja e Champions League, që do të luhet në shtëpi.
“Është e qartë se sot nuk është një ditë si gjithë të tjerat për mua. 25 vitet e mia si lojtar i Bayern Munchen do të përfundojnë në verë. Ka qenë një udhëtim i jashtëzakonshëm, i formuar nga përvoja unike, ndeshje të mëdha dhe triumfe të paharrueshme. Ndihem jashtëzakonisht mirënjohës dhe i lumtur që pata mundësinë ta ndërtoja këtë karrierë me klubin tim të dashur. Lidhja e veçantë me klubin dhe tifozët tanë të mrekullueshëm do të mbetet përgjithmonë. Ajo që dëshiroj si lamtumirë është e qartë: tituj që mund t’i festojmë së bashku dhe momente që do t’i kujtojmë me dashuri për një kohë të gjatë. Do të japim maksimumin në javët në vijim për ta rikthyer titullin e kampionit të Gjermanisë në Mynih dhe për ta arritur finalen tonë të shumëdëshiruar në shtëpi”, shprehet Muller.
“Fitues i Kupës së Botës, dy herë fitues i tripletës, rekordmen në paraqitje. FC Bayern dhe Thomas Müller, 35 vjeç, kanë vendosur së bashku t’i japin fund një karriere unike, që ka zgjatur 25 vite dhe ka sjellë 33 trofe, këtë verë.
Müller, i lindur në Bavari, u bashkua me akademinë e FC Bayern në moshën 10-vjeçare, në verën e vitit 2000, përjetoi një zhvillim të pashembullt, bëri histori me klubin, fitoi gjithçka që mund të fitohej dhe u bë rekordmeni i paraqitjeve të klubit tonë me gjithsej 743 ndeshje zyrtare.
