Tiranë, 2 prill – Transformimi rrënjësor i infrastrukturës arsimore ka qenë një nga prioritetet kryesore të qeverisë gjatë këtyre dhjetë viteve. Me 450 objekte arsimore dhe sportive të ndërtuara ose rikonstruktuara në të gjithë vendin, rreth 200 mijë nxënës dhe mësues kanë sot kushte dinjitoze dhe bashkëkohore për të mësuar dhe mësuar.
Në kuadër të këtij transformimi, në ambientet e shkollës “Besnik Sykja” në Tiranë, Kryeministri Edi Rama, Ministrja e Arsimit dhe Sportit, Ogerta Manastirliu, dhe kryetarja e komanduar e Bashkisë Tiranë, Anuela Ristani, zhvilluan një takim me mësues dhe përfaqësues të komunitetit të prindërve, për të vënë në fokus ecurinë e investimeve në arsimin publik dhe vizionin për të ardhmen.
Kryeministri Edi Rama, duke iu referuar vendimit për mbylljen e TikTok-ut, theksoi se është e rëndësishme ndërveprimi mes prindërve, shkollës, fëmijëve dhe institucioneve.
“Ne do të bëjmë të pamundurën që shkolla të rrisë në mënyrë të ndjeshme fluksin e informacioneve për prindërit, jo më vetëm notat dhe mungesat, por edhe raporte të dedikuara dhe të individualizuara për çdo fëmijë, dhe do të bëjmë çmos që të rrisim e të zgjerojmë hapësirën që mund t’u ofrojmë nxënësve pas mësimit, duke fuqizuar programet e sportit, artit, zejeve dhe duke rritur numrin e adresave ku fëmijët mund të kenë aktivitet.”, tha Kryeministri Edi Rama.
Duke folur për mbështetjen për mësuesit, Kryeministri Edi Rama tha: “Plani ynë është që në vitet e ardhshme, brenda kësaj dekade, ne pagat e mesuesve do t’i çojmë në 1250 euro”.
Ministrja e Arsimit dhe Sportit, Ogerta Manastirliu, duke vënë theksin te investimet në infrastrukturën arsimore, tha se vetëm në Tiranë janë rikonstruktuar dhe rindërtuar 48 shkolla, duke u krijuar mundësi më të mira rreth 38 mijë nxënësve dhe mësuesve.
“450 shkolla janë rindërtuar, janë rehabilituar dhe rikonstruktuar në gjithë vendin. Vetëm në Tiranë janë 48 shkolla të reja që u shërbejnë sot më shumë se 38 mijë nxënësve në Tiranë. Vetëm për këtë vit ne do të bëjmë të mundur që 40 shkolla të tjera të rehabilitohen apo të rindërtohen nga Shkodra, Kukësi, Dibra deri në jug të vendit, në Sarandë, Gjirokastër, dhe do të jenë 40 kantiere të reja të cilat hapen, që do të kemi mundësi jo vetëm të përmirësojmë infrastrukturën shkollore, por dhe të ofrojmë një cilësi të re shërbimi arsimor, sepse të gjitha këto shkolla kanë parametra bashkëkohorë: jo vetëm klasa, jo vetëm laboratorë, por edhe terrene sportive dhe palestra. Janë 200 palestra dhe terrene sportive që i janë shtuar infrastrukturës arsimore në të gjithë vendin.”, tha Ministrja e Arsimit dhe Sportit, Ogerta Manastirliu.
Ministrja Manastirliu foli edhe për programin e ri pas shkolle për nxënësit.
“Ne tashmë kemi nisur punën për të pasur një program të ri, që lidhet direkt me kërkesën e prindërve një kërkesë që është programi i ushqimit në shkolla dhe programi pas-shkollor për të gjithë fëmijët, por edhe për prindërit që duan të kenë lehtësi dhe janë të angazhuar me punë. Ky program do të fillojë fillimisht në bashkitë qendër qarku dhe më pas do të vijojë edhe në bashkitë e tjera”, tha Manastirliu.
Po ashtu, qeveria, tha Ministrja Manastirliu, është e angazhuar për të forcuar figurën e mësuesit, jo vetëm përmes përmirësimit të kushteve të punës dhe rritjes së pagave por dhe zhvillimit profesional të tyre.
“Shtylla e sistemit tonë arsimor janë mësuesit, ndaj mbështetja për mësuesit ka qenë në mënyrë të vazhdueshme. Paga mesatare për mësuesit sot është 950 euro, por ajo që kemi mundësuar është sistemi i ri i zhvillimit profesional të mësuesve, që do të ridimensionojë tërësisht edhe mënyrën sesi i qaset një mësues kurrikulës së re, aftësive të reja dhe kompetencave që kërkohen sot në funksion të mësimdhënies dhe mësimnxënies. Ne mundëm jo vetëm të riorganizojmë sistemin e kualifikimit të mësuesit, duke dyfishuar përfitimet për mësuesit që marrin gradën e mësuesit të kualifikuar, specialist apo mjeshtër, dhe nga ana tjetër për herë të parë të garantojmë që sistemi i trajnimeve dhe krediteve të përfituara për mësuesit të mundet të certifikohet nga universitetet.”, deklaroi Ministrja e Arsimit dhe Sportit, Ogerta Manastirliu.
Në fund Ministrja Manastirliu u ndal te siguria në shkolla si një është një nga prioritetet kryesore të programit të Ministrisë së Arsimit dhe Sportit për krijimin e një mjedisi të sigurt dhe gjithëpërfshirës për nxënësit.
“Ne po vijojmë të mbështesim të gjithë rrjetin e shkollave duke rritur numrin e oficerëve të sigurisë në shkolla. Për vitin e ri shkollor do të kemi 130 oficerë sigurie më shumë, duke e çuar në 400 numrin e oficerëve të sigurisë në shkolla dhe duke përmirësuar standardin për oficerët e sigurisë, bazuar në numrin e nxënësve në shkollë. Do të bëjmë të mundur fillimin e programit për monitorimin e kamerave inteligjente në shkolla. E rëndësishme është dhe siguria në rrugë, ndaj jemi duke punuar për një program që të ngremë një shoqëri të transportit publik shkollor, që fëmijët që janë larg vendbanimit të mund të jenë pjesë e këtij programi.”, tha Ministrja e Arsimit dhe Sportit, Ogerta Manastirliu.
