Kandidati i Koalicionit Euroatlantik për Tiranën, Pellumb Seferi, ka zhvilluar një aktivitet të ngjashëm me takimet tradicionale me qytetarët, duke shëtitur në rrugët e kryeqytetit dhe duke u takuar me njerëzit e zakonshëm. Në një postim të tij në rrjetet sociale, Seferi shprehu angazhimin e tij për të dëgjuar hallet dhe shpresat e qytetarëve dhe për të lidhur një besë të fortë për një ndryshim të vërtetë.
“Mes njerëzve të zakonshëm, me fjalën e thjeshtë dhe zemrën plot besim, do të ecim për të dëgjuar dhe për t’i dhënë zgjidhje nevojave të tyre,” shkruan Seferi, duke shtuar se ndryshimi i kërkuar nga qytetarët mund të arrihet vetëm me bashkëpunim dhe angazhim të gjithsecilit. Ai nënvizon se koalicioni që ai përfaqëson ka si qëllim një të ardhme më të mirë për Shqipërinë dhe se çdo votë është një hap më afër realizimit të këtij qëllimi.
Seferi ftoi qytetarët që të besojnë tek e ardhmja dhe ta mbështesin Koalicionin Euroatlantik për një Shqipëri të integruar dhe me mundësi të barabarta për të gjithë. “Bashkë mund ta ndërtojmë të ardhmen që meritojmë,” theksoi ai në përfundim të postimit të tij, duke apeluar për mbështetje në zgjedhjet e ardhshme.
