Kryeministri Edi Rama ka postuar ditën e sotme pamje nga hangari i ri në Bazën Ajrore të Farkës, i ndërtuar posaçërisht për helikopterët “Black Hawk” të Forcës Ajrore shqiptare.
Në postimin e tij, kreu i qeverisë thotw se ky është një tjetër investim në funksion të rritjes së kapaciteteve të ushtrisë shqiptare dhe modernizimit të saj sipas standardeve të NATO-s.
“Helikopterët Black Hawk të Forcës sonë Ajrore do të kenë ‘shtëpinë’ e tyre të dedikuar në Bazën Ajrore të Farkës, aty ku sapo ka përfunduar ndërtimi i hangarit të ri,” shkruan Rama.
Hangari, sipas kryeministrit, garanton kushte moderne për mirëmbajtjen e helikopterëve, si dhe përmirëson ndjeshëm ambientet e punës për pilotët dhe teknikët e Forcës Ajrore.
“Investimi në infrastrukturë dhe modernizim do të rrisë operacionalitetin e Bazës së Farkës, duke ofruar të gjitha lehtësirat jo vetëm për kryerjen e punimeve të mirëmbajtjes së helikopterëve, por edhe përmirësimin e kushteve të punës për pilotët dhe teknikët tanë,” -shkruan Rama.
“Black Hawk” janë helikopterë të avancuar shumëpërdorimësh, të prodhuar nga kompania amerikane Sikorsky. Të dizenjuar për transport taktik, mbështetje luftarake, kërkim-shpëtim dhe operacione emergjente, ata përdoren gjerësisht nga ushtria amerikane dhe vendet aleate të NATO-s. Shqipëria ka nisur pajisjen me këtë tip helikopterësh si pjesë e rritjes së kapaciteteve mbrojtëse dhe përmbushjes së detyrimeve si vend anëtar i Aleancës.
