Namir Lapardhaja/
Në vitin 2021, Partia Demokratike humbi zgjedhjet me një diferencë prej rreth 36 mijë votash ndaj Partisë Socialiste. Ishte një rezultat i kontestuar nga vetë PD për shkak të fenomeneve të manipulimit zgjedhor, si rasti Çyrbja i faktuar më pas nga SPAK apo si ngjarja e rëndë në Elbasan. Megjithatë, edhe pse mes kushteve të vështira, ai rezultat, më pas, u cilësua si “tradhti” dhe “shitje” nga Berisha, i cili ngriti një furtunë, duke e shkallmuar PD-në me preteksin e “pengmarrjes” nga Rama, SOROS-i dhe ambasada e SHBA-ve.
Katër vite më pas, me më shumë skandale dhe afera korruptive të qeverisë, me një pushtet të goditur nga të gjitha anët nga Prokuroria e Posaçme, Partia Demokratike e drejtuar nga Sali Berisha ka rënë në një humnerë zgjedhore që nuk mund të fshihet më pas justifikimeve: mbi 250 mijë vota minus nga rezultati i Bashës në 2021.
Në emër të “sovranitetit” u ndërtua një narrativë që kërkonte të “çlironte” PD-në nga influencat e jashtme dhe të “përmbyste” “shërbëtorët” e ndërkombëtarëve në këtë parti, por e gjithë kjo përfundoi në një skenë qesharake, duke u paguar 6 milionë dollarë për një vizë amerikane, që nuk u mor kurrë, me shpresën për të rikthyer një perceptim se demokratët kanë mbështetjen e SHBA-ve në përballjen me Ramën.
Berisha pati premtuar se nuk do ta përfshinte Partinë Demokratike në betejën e tij personale me Shtetet e Bashkuara, por shumë shpejt PD-ja u vu në funksion të interesave personale përmes firmosjes së kontratave lobuese, duke përdorur emrin dhe vulën e partisë për qëllime që nuk kishin asnjë lidhje me kauzën politike.
Ironikisht, në emër të “demokracisë së brendshme”, u rrëzua një drejtues që u zgjodh me votë dhe u zëvendësua me një strukturë që prodhoi emërime të njëpasnjëshme, pa garë, pa transparencë dhe me të njëjtët emra që dikur konsideroheshin simbole të dështimit. Për të mos përmendur talljen me të ashtuquajturën ‘Primare’.
Krahasuar me vitin 2021, sot Partia Demokratike është jo vetëm më e përçarë, por më e dobët dhe më e papërfaqësuar se asnjëherë më parë. Ajo është më e pashpresë, më e pamotivuar dhe në qorrsokak, që askush nuk guxon të drejtojë gishtin te problemi real.
Nëse në 2021 u pretendua se zgjedhjet “u shitën” nga Basha, çfarë ndodhi në 2025, kur Rama doli më i fortë se ç’ishte? Kush i “shiti” zgjedhjet kësaj radhe?
Premtimet për protesta të fuqishme, që nuk do të ishin më “xhiro në bulevard” si “në kohën e Lulit”, përfunduan me ndezje qirinjsh në shkallët e Kryeministrisë. Ndërkohë, falë këtij “revolucioni”, Edi Rama ka 83 mandate dhe një kod zgjedhor të ofruar në tavolinë nga të njëjtët që pretendonin se do ta rrëzonin.
Në këtë panoramë, nuk mund të trajtohet i shkëputur rezultati i Bashës në zgjedhjet e 11 majit. Ai u formësua në një terren armiqësor, të mbushur me fake news, linçime të vazhdueshme, sulme të organizuara, shpifje mediatike dhe bllokadë totale informuese. U zhvillua në një fushë të pabarabartë, ku njëra palë kishte në dispozicion asetet zyrtare të krijuara nga rezultati i 2021-shit. Pikërisht nga rezultati i kontestuar i Bashës. Sigurisht që Basha dhe njerëzit e tij duhet të bëjnë analizë dhe ta shohin atë rezultat edhe si një mënyrë për të reflektuar dhe për të nxënë mësime nga ajo që kanë bërë jo mirë dhe do duhet të kishin bërë ndryshe.
Mirëpo, sot ajo që shihet qartë është se “karma” politike e Bashës i qëndron si shpatë “kokës” së Berishës për të kërkuar llogari për atë që premtuan ringritjen dhe sollën fundosjen, duke u përballur me gënjeshtrat dhe mashtrimet e tyre, të cilat dikur i kishin hedhur pa të drejtë mbi të tjerët.
