Desiré Doué ka qenë në dyshim deri në fund. Ka qenë në garë me Barcola-n, autor i një dopiete në finalen e Kupës së Francës kundër Reims më 24 maj.
Por Luis Enrique e ka menduar për dy netë rresht dhe në fund ka vendosur të besojë tek ai. Dhe ja ku Doué i bëri vetes një dhuratë të jashtëzakonshme. Pas tre ditësh mbush 20 vjeç. Ai e përmbysi Interin me lëvizjet e tij, arriti të bënte atë që Yamal nuk e bëri në 180 minuta (plus shtesën). Sigurisht, katalanasi ishte gjithsesi i mrekullueshëm, por ky djalosh – i lindur më 3 qershor 2005 në Angers – u tregua më konkret. Asist, gol dhe Liga e Kampionëve e parë për PSG-në.
Talent i jashtëzakonshëm
Kjo e Luis Enriques është skuadra e dytë franceze që ka fituar kompeticionin më të lartë europian, pas Marseille në vitin 1993 kundër Milanit (dhe gjithashtu në Mynih). Për Doué, PSG-ja në verën e vitit 2024 investoi plot 60 milionë euro duke e blerë nga Rennes (i njëjti klub që promovoi Dembélé-n në futbollin e madh). Ai debutoi në ekipin e parë në moshën 17-vjeçare, në vitin 2022, duke impresionuar menjëherë me pjekurinë dhe teknikën e tij. Ai tregoi se është një talent i jashtëzakonshëm. Në dy sezone ka grumbulluar 57 paraqitje dhe shtatë gola në Ligue 1, duke u bërë një nga surprizat më të ndritshme të kampionatit francez. Shifra të rëndësishme për një djalosh, që fitoi fanellën e PSG-së.
Kampion edhe jashtë fushës
Disa ishin skeptikë, por ai i ka heshtur të gjithë dhe në Mynih ishte thjesht i mrekullueshëm, duke fituar Tripletën. Luis Enrique e pëlqen edhe për karakterin e tij. Ka këmbë në tokë, zakonisht qëndron larg dritës së prozhektorëve. Dhe mbi të gjitha nuk përfundon kurrë në qendër të thashethemeve. Pra, flitet pak për të dhe ai flet vetëm në fushë.
Luajti në të gjitha rolet e sulmit: anësor, sulmues, mesfushor ofensiv. “Jam një lojtar ofensiv, por gjatë përgatitjes kam mësuar të luaj më thellë. Kam përvetësuar disa nga aspektet mbrojtëse që janë thelbësore në nivelin më të lartë. Një sulmues duhet të dijë të mbrohet, të ushtrojë presion dhe të ndryshojë pozicion”, ka thënë gjithmonë ai.
Xhaxhai gjyqtar në Brazil 2014
Dhe kështu, pas përfundimit të epokës së “figurave të famshme” – me largimet e Mbappé, Neymar dhe Messi – Doué është shembulli konkret se edhe të rinjve duhet t’u jepet besim. Diçka që nuk ndodh kurrë në Itali – thuhet për mungesë talenti. Prandaj Evropa tani mund të ngrihet në këmbë për të duartrokitur këtë thuajse 20-vjeçar. Që dje u bë makthi i Interit.
Familja e tij është e gjitha me lidhje në futboll: vëllai i tij është Guela Doué, mbrojtës i Strasburgut. Ndërsa kushëriri i tij Yann Gboho është mesfushor i Toulouse. Por vëmendje: xhaxhai i tij, Nourmandiez Desiré Doué, 53 vjeç, është një ish-gjyqtar futbolli nga Bregu i Fildishtë. Ai ka qenë madje gjyqtari i parë me origjinë nga Bregu i Fildishtë që ka arbitruar një ndeshje të Kupës së Botës: arbitroi ndeshjen Kili-Australi (3-1) dhe Francë-Ekuador (0-0) në Botërorin Brazil 2014. Që nga viti 2022 është edhe në krye të sektorit të arbitrimit të Konfederatës Afrikane të Futbollit (CAF). Një familje me shumë talent – dhe tani me një kampion Europe. Quhet Desiré Doué.
