Prillin e kaluar, ish-presidenti i Ferrarit, Luca Cordero di Montezemolo, zgjodhi një Grand Prix të caktuar për t’u rikthyer në pistën e Formula 1, më shumë se dhjetë vjet pas lamtumirës së tij me ‘Kokëkuqen’, me praninë e tij të fundit zyrtare gjatë GP të Monzës në shtator 2014.
I ftuar i Princit të Kurorës Salman bin Hamad Al-Khalifa, Montezemolo në fakt kishte marrë pjesë në fundjavën e garës në Bahrein ku australiani Oscar Piastri kishte çuar McLarenin e tij në shkallën më të lartë të podiumit. Një festë për të gjithë vendin, shtëpinë e dytë të kompanisë britanike, në pronësi të fondit sovran të Bahreinit, Mumtalakat Holding Company.
KTHESA E NGJARJEVE – Gjatë fundjavës së garës në Bahrein, ish-presidenti i Ferrarit u pa duke përqafuar drejtorin e ekipit të McLaren, ish-inxhinierin nga Maranello, Andrea Stella. Megjithatë, deri dje askush nuk dukej se ishte në gjendje ta imagjinonte skenarin që u materializua shpejt. Njeriu që simbolizonte “Kokëkuqen”, i cili nga viti 1991 deri në vitin 2014 drejtoi Ferrarin si president i kompanisë, është bashkuar me bordin e drejtorëve të McLaren.
Rikthimi i Montezemolos nuk do të jetë një rikthim në Formula 1, ose më përgjithësisht në sektorin e sporteve motorike, por do të ketë të bëjë me konsulencën automobilistike të markës angleze.
