Komisionerja për Zgjerimin, Marta Kos, ka folur për procesin e anëtarësimit të vendeve të Ballkanit Perëndimor në BE.
Komisionerja për Zgjerim deklaroi në Komisionin e Jashtëm të Parlamentit Evropian se është reale mundësia që brenda vitit 2029 të anëtarësohen një ose më shumë vende kandidate.
Ajo përmendi specifikisht Shqipërinë, teksa tha se po bën reforma më të shpejta se më parë.
“Ne kemi mundësi reale që brenda vitit 2029 të anëtarësojmë një ose më shumë shtete kandidate me të drejta të plota si vende anëtare të BE. Në Shqipëri kemi hapur tashmë 24 kapituj të negociatave.
Vetëm në dy muajt e fundit kemi hapur grupkapitullin e dytë dhe të tretë. Ky shtet kandidat e ka kuptuar momentin e ri për zgjerimin duke bërë reforma më të shpejta se më parë.
Ne duam që shtetet kandidate të jenë pjesë e sistemit tonë të përbashkët të sigurisë. Shteti ligjor është i panegociueshëm”, tha Kos.
