Të hënën në mëngjes, udhëtimi i Greta Thunberg dhe “jahtit të selfie-t” të saj mori një fund të papritur. Ushtria izraelite ndaloi velierën “Madleen” gjatë rrugës për në bregun e Gazës dhe e devijoi. Të hënën në mbrëmje, varka së bashku me ekuipazhin arriti në portin e Ashdodit.
“Pasagjerët e ‘jahtit të selfie-t’ kanë mbërritur në aeroportin Ben-Gurion në Tel-Aviv për të lënë Izraelin dhe për t’u kthyer në vendet e tyre të origjinës”, shkroi Ministria e Jashtme izraelite herët në mëngjes të martën në X. Ata pritet të largohen sot.
Më herët, ministri i Mbrojtjes, Israel Katz, deklaroi se kishte urdhëruar ushtrinë t’i tregonte ekuipazhit të Thunberg një video që dokumenton mizoritë e kryera nga terroristët e Hamasit më 7 tetor 2023. Më pas, Katz tha se aktivistët kishin refuzuar të shikonin pamjet filmike.
E dyshimtë: Një video e regjistruar nga ekuipazhi tregon se si anëtarët e ekuipazhit përreth Greta Thunberg, hedhin telefonat dhe laptopët e tyre në Detin Mesdhe – pak para se ushtarët izraelitë të hipnin në bord.
“Telefonat në ujë”, dëgjohet në sfondin e videos. Mesa duket, ata që e urrejnë Izraelin donin me çdo kusht të parandalonin që pajisjet e tyre të binin në duart e forcave izraelite të sigurisë.
Çfarë po përpiqeshin të fshehin? Kjo mbetet e paqartë.
Është e mundur që bëhet fjalë për lidhje me terroristë palestinezë. Në telefonat dhe laptopët mund të ketë pasur prova për këtë.
Sepse fakt është: të njëmbëdhjetë mbështetësit rreth Greta Thunberg NUK ishin thjesht aktivistë të pafajshëm që donin të ndihmonin banorët e Rripit të Gazës me ushqim. Por simpatizantë të urrejtjes kundër Izraelit me lidhje me terroristë.
-Ndër ta është, për shembull, braziliani Thiago Avila, i cili në fillim të vitit mori pjesë në ceremoninë mortore të shefit të vrarë të Hezbollah-ut dhe foli me fjalët më të larta për këtë udhëheqës terrorist.
-Po ashtu, pjesë e grupit është Yasemin Acar nga Berlini. Ajo festoi publikisht sulmin me raketa të Iranit ndaj Izraelit në prill 2024.
Eksplozive: Sipas gazetës britanike ‘The Telegraph’, pas aksionit të supozuar humanitar qëndron në të vërtetë një person i dyshuar si anëtar i Hamasit nga Londra.
Zaher Birawi e ka përshkruar veten si “anëtar themelues” i organizatës që kishte planifikuar udhëtimin drejt Gazës. Biraëi, i cili paraqitet publikisht si gazetar, ishte një javë më parë me Greta Thunberg gjatë pagëzimit të jahtit “Madleen” dhe e transmetoi drejtpërdrejt nga doku në Siçili.
Në vitin 2012, sipas gazetës britanike, Zaher Birawi është fotografuar me ish-udhëheqësin e Hamasit, Ismail Haniyeh, i cili u vra vitin e kaluar nga një shpërthim.
Edhe pse më pak serioze krahasuar me lidhjet e mundshme me Hamasin, një veprim tjetër nuk ka kaluar pa kritika në rrjetet sociale: fakti që pikërisht Greta Thunberg, dikur ikona e lëvizjes për klimën, ndoti Mesdheun. Hedhja e pajisjeve elektronike si telefonat dhe laptopët në ujë sjell ndotje të rëndë, për shkak të kimikateve toksike dhe metaleve të rënda (si litiumi) që dëmtojnë seriozisht ekosistemin detar.
Varka me vela “Madleen” ishte nisur nga Sicilia më shumë se një javë më parë. Greta Thunberg, së bashku me 11 mbështetës, synonte të lundronte drejt Gazës për të thyer bllokadën detare të vendosur nga Izraeli dhe për të dërguar një sasi të vogël ndihmash për civilët në nevojë. Të hënën në mëngjes, ata u ndaluan nga ushtria izraelite. Sasia e vogël e ndihmave që kishin me vete pritet të dërgohet në Gaza.
Fotot dhe videot tregojnë ushtarë izraelitë duke u shpërndarë aktivistëve shishe me ujë dhe sanduiçe, të cilat ata i morën me mirënjohje. Ministria e Jashtme e Izraelit shkroi në X: “Të gjithë pasagjerët janë mirë dhe pa lëndime. Ata janë furnizuar me sanduiçe dhe ujë. Spektakli mbaroi”. (BILD)
