Në një vendim që hedh dyshime mbi besimin në sistemin gjyqësor shqiptar, Këshilli i Lartë Gjyqësor (KLGJ) ka refuzuar kërkesën e Inspektorit të Lartë të Drejtësisë (ILD) për ndëshkimin e gjyqtares Antonela Prendi, e cila akuzohet për vonesa skandaloze në dorëzimin e vendimeve gjyqësore. Gjyqtarja Prendi ka kaluar çdo kufi të pranueshëm profesional, duke mos dorëzuar 21 vendime brenda afateve të përcaktuara, përfshirë një vendim që është vonuar mbi dy vite e katër muaj.
Këto vonesa nuk janë gabime të vogla apo raste të rastësishme. Ato janë një turp i hapur për drejtësinë shqiptare dhe një goditje fatale ndaj besimit të qytetarëve në gjyqësor. Megjithatë, KLGJ ka zgjedhur të mbyllë sytë, duke hedhur poshtë propozimin e ILD-së për masë disiplinore ndaj Prendit, duke bërë që kjo sjellje skandaloze të mbetet e pandëshkuar.
ILD thekson qartë se vonesat nuk justifikohen nga arsye personale apo shëndetësore, por burojnë nga pakujdesia dhe neglizhenca flagrante e gjyqtares. Për më tepër, është e papranueshme që një magjistrate me mbi 19 vjet përvojë në sistem të lejojë vonesa të tilla të mëdha, duke dëmtuar rëndë figurën e gjyqtarit dhe duke shkelur rëndë besimin publik.
Në vend që të marrë përgjegjësi, mbrojtja e Prendit ka përdorur si justifikim “ngarkesën e madhe të punës” dhe “gabime njerëzore”, duke u përpjekur të relativizojë një dështim profesional të papranueshëm. Dhe KLGJ i ka dhënë dritën jeshile këtij qëndrimi, duke lënë të kuptohet se vonesat në dorëzimin e vendimeve janë thjesht një realitet normal dhe i pafajshëm në drejtësinë shqiptare.
Ky vendim i KLGJ është një turp kombëtar dhe një shkelje flagrante e parimeve të përgjegjshmërisë. Në vend që të mbrojë sistemin dhe të garantojë drejtësi efektive, KLGJ po mbron pakujdesinë dhe sjelljen e papërgjegjshme të magjistratëve, duke i dhënë mesazh të qartë publikut: në drejtësi mund të vonohesh edhe për vite, dhe asgjë nuk do të ndodhë me ty.
Ndërkohë që qytetarët presin me muaj dhe vite për drejtësi, magjistratët që shkelin afatet dhe dëmtojnë sistemin mbrohen nga vetë KLGJ. Ky është një tjetër dëshmi e qartë se reforma në drejtësi është në një rrugë të gabuar, dhe se mungesa e llogaridhënies vazhdon të dominojë sistemin.
Në vend që të jetë mbrojtësi i drejtësisë, KLGJ po bëhet mburoja e padrejtësisë dhe mosveprimit. Një precedent i rrezikshëm që rrënon çdo shpresë për një drejtësi të shpejtë dhe të paanshme në Shqipëri./Lexo.al
Punoi mbi lajmin gazetari Hermes Kafexhiu
