Lëvizja palestineze Hamas, paralajmëroi sot se izraelitët e marrë peng, që ndodhen ende në duart e tyre, do të ekspozohen ndaj “të njëjtëve rreziqe” si luftëtarët e grupit në rast të një ofensive të madhe që Izraeli pritet të ndërmarrë në qytetin e Gazës.
“Do të kujdesemi për të burgosurit (pengjet), sa më mirë të mundemi, por ata do të qëndrojnë përkrah luftëtarëve tanë në zonat e betejës dhe do t’i nënshtrohen të njëjtave rreziqe dhe kushte jetese”, thuhet në një deklaratë të publikuar nga Hamasi.
Në të njëjtën deklaratë, zëdhënësi i krahut të armatosur të Hamasit, i njohur me nofkën Abu Obeida, thekson gjithashtu: “Për çdo peng që do të vritet gjatë ofensivës, do të publikojmë emrin, fotografinë dhe provën e vdekjes së tij.”
Këto paralajmërime vijnë ndërsa ushtria izraelite ka marrë urdhër nga qeveria e kryeministrit Benjamin Netanyahu që të përgatitet për një sulm të madh në qytetin e Gazës. Qëllimi i deklaruar i operacionit është eliminimi i Hamasit dhe kthimi në shtëpi i të gjithë pengjeve që ende mbahen në Rripin e Gazës.
Nga 251 pengjet e rrëmbyer gjatë sulmit të Hamasit më 7 tetor 2023 në jug të Izraelit, 47 mbeten ende në Gaza. Rreth 20 prej tyre besohet se janë ende gjallë.
Sipas vlerësimeve të OKB-së, rreth një milion palestinezë ndodhen aktualisht në qytetin e Gazës, të cilin ushtria izraelite e shpalli sot zyrtarisht “zonë lufte”.
