Komisioni për Çështjet Europiane është mbledhur paraditen e sotme për të shqyrtuar projekt pozicionin negociues për Grupkapitullin e V-të “Burimet, bujqësia dhe kohezioni” për negociatat me BE-në. Kryetarja e Komisionit Jorida Tabaku e cilësoi mbledhjen antikushtetuese dhe refuzoi pjesëmarrjen. Ajo theksoi se për një javë sesioni i ri parlamentar dhe opozita e ka prioritet procesin e integrimit.
“I sqarova qeverisë se mbledhja e komisionit jashtë sesionit është antikushtetuese! Për një javë fillon sesioni i ri parlamentar dhe opozita e ka prioritet procesin e integrimit, duke bërë gjithçka që është në dorën e saj, ashtu siç ka bërë në çdo rast për këtë proces!”, u shpreh Tabaku.
Nga ana tjetër socialistët theksuan se mbledhja ishte e domosdoshme për të mos rrezikuar konferencën ndërqeveritare me BE-në më 2 shtator. Nënkryetarja e Komisionit, Etilda Gjonaj u shpreh se mbledhja ishte tërësisht e bazuar në ligj dhe rregulloren e parlamentit. Ajo theksoi se mbledhja e sotme ishte shumë e rëndësishme për shkakun e një urgjence që ka qeveria për të depozituar pozicionin negociues për klasterin 5, me datën 2 shtator.
“Pse e thirrën 1 e 4 e deputetëve mbledhjen është se nëse nuk e thërret kryetari i Komisionit e thërret ¼ e anëtarëve të Komisionit. Meqënëse kryetarja nuk pranoi që ta thërriste mbledhjen, ne u detyruam që të kalonim në dispozitën tjetër të ligjit për të thirrur mbledhjen”, u shpreh Gjonaj.
Tabaku shtoi se kishte ofruar zgjidhje për të kaluar ngërçin, por zgjidhjet nuk ishin pranuar nga qeveria.
“Ofrova disa zgjidhje praktike se si mund ta kalonim këtë ngërç, por qeveria vazhdoi në mënyrë të njëanshme! Asnjë nga deputetët që sot kanë thirrur mbledhje nuk janë të rizgjedhur dhe nuk kanë legjitimitetin për të thirrur mbledhje jashtë sesionit!”, tha Tabaku.
