Presidenti i Ukrainës, Volodymyr Zelensky, ka dekretuar më 27 gusht emërimin e Olha Stefanishynas si ambasadore të re të vendit në Shtetet e Bashkuara.
Ajo pason në këtë detyrë Oksana Markarovën, e cila mbajti postin për rreth gjashtë vite.
Stefanishyna, e njohur për rolin e saj si zëvendëskryeministre për Integrimin Evropian dhe Euro-Atlantik, si dhe për një periudhë si ministre e Drejtësisë, cilësohet një nga figurat më të angazhuara në procesin e afrimit të Ukrainës me Bashkimin Evropian dhe NATO-n.
Pak kohë më parë, ajo zhvilloi dhe një vizitë në Shqipëri.
Me përvojën e saj, ajo pritet të forcojë linjën diplomatike në një nga partneritetet më të rëndësishme strategjike për Kievin.
Në dekretimin e tij, Zelensky theksoi se ambasadorja e re ka detyrë të ringjallë punën e Ambasadës në Washington dhe të zbatojë në mënyrë të plotë marrëveshjet e arritura me Shtetet e Bashkuara, përfshirë ato në fushën e mbrojtjes dhe bashkëpunimit për dronët.
“Roli i saj do të jetë kyç në sigurimin e mbështetjes afatgjatë për Ukrainën dhe në forcimin e marrëdhënieve me SHBA-të,” u shpreh Zelensky.
Ndërkohë, ai falënderoi edhe ambasadoren në largim, Oksana Markarova, duke theksuar se kontributi i saj në përballimin e viteve më të vështira të vendit ishte vendimtar dhe duke e ftuar të mbetet pjesë e trupës diplomatike ukrainase.
