Sipërmarrësi dhe miliarderi amerikan, Elon Musk, shprehu shqetësim serioz për të ardhmen e kontinentit europian për shkak të nivelit të ulët të lindshmërisë.
Në llogarinë e tij në rrjetin social X, biznesmeni reagoi ndaj statistikave alarmante nga Skocia, ku në gjashtëmujorin e parë të vitit 2025 numri i vdekjeve ka tejkaluar lindjet me 34%.
“Nëse norma e lindjeve nuk rikthehet të paktën në nivelin e zëvendësimit, Europa do të shuhet,” – deklaroi Musk në komentin e tij.
Ekspertët theksojnë se për të ruajtur popullsinë, norma e lindshmërisë duhet të jetë të paktën 2.1 fëmijë për grua. Ndërkohë, një pjesë e shkencëtarëve besojnë se për mbijetesë afatgjatë të popullsisë, kjo shifër duhet të jetë edhe më e lartë – rreth 2.7 fëmijë për grua.
Situata aktuale në Europë paraqitet shqetësuese: në Angli dhe vendet e Bashkimit Europian, norma e lindshmërisë ka rënë në 1.4, ndërsa në Skoci është edhe më e ulët – vetëm 1.3, një minimum historik.
Musk, vetë baba i të paktën 14 fëmijëve, mbështet në mënyrë aktive kërkimet në fushën e demografisë, duke dhënë miliona për këtë kauzë. Ai shpesh tërheq vëmendjen e publikut ndaj problemit të rënies së lindshmërisë në Europë dhe është i bindur se kriza demografike përbën “një rrezik shumë më të madh për civilizimin” sesa ndryshimet klimatike.
Sipas të dhënave të OKB-së, prirja globale e uljes së lindshmërisë është vërejtur prej më shumë se gjysmë shekulli. Në vitin 2024, mesatarja globale ishte rreth 2.2 lindje për grua, shumë më poshtë krahasuar me 5 fëmijë në vitet 1970 dhe 3.3 në vitet 1990.
