Ukraina ka thënë se shkatërroi dy ura brenda Rusisë duke përdorur disa dronë të lirë për të goditur depot e minave dhe municioneve të fshehura atje nga forcat ruse.
Ushtria ukrainase tha se dy urat pranë kufirit me rajonin e Kharkiv të Ukrainës po përdoreshin nga ushtria ruse për të furnizuar trupat e saj.
Për shkak të rëndësisë së tyre strategjike, urat ishin të minuara – në mënyrë që ushtria ruse të kishte mundësinë t’i hidhte në erë në rast të një avancimi të papritur të Ukrainës.
Nuk është e pazakontë që një ushtri nën sulm të shkatërrojë ura, rrugë dhe infrastrukturë tjetër kyçe në territorin e vet për të parandaluar përparimin e armikut. Ukraina e bëri këtë në ditët e para të pushtimit në shkallë të plotë në shkurt 2022, duke shkatërruar urat në rrugët që të çonin drejt Kievit. Ky veprim vonoi përparimin rus dhe mbrojti kryeqytetin ukrainas.
Në rastin e dy urave në Rusi, ushtria ukrainase mësoi për depot e minave dhe i përdori ato në avantazhin e vet. Brigada e 58-të e Këmbësorisë së Motorizuar e Ukrainës, e cila kreu operacionin, i tha CNN se vendosën ta shikonin urën nga afër pasi vunë re një aktivitet të pazakontë përreth saj.
“U bë e qartë se diçka po ndodhte atje. Ne nuk mund të fluturonim një dron të rregullt zbulues nën urë sepse sinjali thjesht do të zhdukej, kështu që fluturuam me një dron me pamje nga personi i parë të pajisur me fibra optike”, tha një përfaqësues i brigadës.
Një video e filmuar nga droni e tregon atë duke iu afruar urës dhe duke zbuluar një grumbull të madh minash antitank dhe municionesh të tjera. Një copë pëlhure që duket se ka mbuluar sasinë e madhe shihet e shtrirë anash.
“Ne i pamë minat dhe goditëm”, shtuan ata. Videoja përfundon papritur kur droni godet depon. Pamjet e filmuara nga një kamera e dytë nga një distancë tregojnë një shpërthim të madh. Wshtw përcaktuar vendndodhjen gjeografike të urës që shihet në video në rajonin e Belgorodit në Rusinë jugore, pranë kufirit me Ukrainën.
“Pas kësaj, vendosëm të kontrollonim urën tjetër. Zbuluam se ishte gjithashtu e minuar dhe e goditëm”, tha përfaqësuesi i brigadës, duke shtuar: “Pamë një mundësi dhe e shfrytëzuam”.
Shkatërrimi i urave – dhe mënyra e guximshme se si Ukraina e arriti këtë – është një lajm i rrallë i mirë për Kievin. Ukraina po përballet me një situatë të vështirë përgjatë vijave të frontit, ndërsa trupat ruse vazhdojnë të përparojnë ngadalë, ndërsa presidenti rus Vladimir Putin vazhdon të vonojë çdo bisedime për armëpushim.
