Ndërtimi i HEC-it në zonën e Lufajt nuk ka sjellë vetëm zhvillim energjetik, por mbi të gjitha, ka ndikuar drejtpërdrejt në përmirësimin e jetës së banorëve. Inxhinieri Bardhyl Muceku thekson se prioriteti kryesor i projektit ka qenë gjithmonë njeriu dhe nevojat e tij.
“Primar është njeriu dhe kur ka nevojë, i duhet dhënë banorit. Është për vaditjen edhe më pas vaditja. Në bazë të llogarive tona, ne nuk e shfrytëzojmë ujin 100 përqind, por 95 përqind, dhe e lëmë edhe për banorët si një ndihmë për komunitetin,” – u shpreh Muceku, duke theksuar ndjeshmërinë sociale të projektit.
Ai sqaroi gjithashtu se janë lënë akses të hapur për dy shtëpi në zonën e poshtme që të përdorin ujin në mënyrë të vazhdueshme:
“Është i hapur tubi dhe merr ujin. Merret aktualisht uji, ky tubi është instaluar dhe merr non-stop.”
Ndërkohë, një tjetër përfitim kyç për fshatin ka qenë qasja në ujë, një luks për shumë vite me radhë. Sipas një reportazhi të publikuar nga Lexo.al, i realizuar nga botuesi Flogert Muça me pjesëmarrjen e pedagogut dhe inxhinierit Bardhyl Muceku, aktualisht HEC-et në zonë janë jashtë funksionit energjetik dhe shfrytëzohen vetëm për të furnizuar komunitetin me ujë të bollshëm.
Ky ujë merret pa prekur burimet lokale, duke respektuar rrjedhën ekologjike, dhe përmes tunelit të HEC-it, mbërrin deri në fshatin Lufaj, i cili më parë nuk kishte asnjë mundësi për ta përdorur.
