Dy ditë pas humbjes në Elbasan nga moshatarët e Gjermanisë, Shpresat e Alban Bushit u mposhtën sërish sot, 2-1 nga Zvicra në udhëtim. Golin e Shqipërisë e realizoi Aidon Shehu.
Zvicra gjeti golin në minutën e 27’ pas një gabimi në mbrojtje. Liam Chipperfield i dha avantazhin helvetëve.
Shqipëria i shkoi shumë pranë barazimit në minutën e 38’ me Elton Fikajn, por goditja e mbrojtësit u ndal nga traversa. Pjesa e parë u mbyll 1-0.
Fraksioni i dytë nisi me dy ndryshime për Shqipërinë. Trajneri Bushi aktivizoi Rashicën dhe Përndrecën, ndërsa nga loja dolën Gudjufi dhe Osmani.
Kuqezinjtë dominuan lojën në pjesën e dytë dhe në minutën e 65’ barazuan rezultatin me Aidon Shehun, i cili realizoi një gol spektakolar me një goditje fantastike nga jashtë zone.
Zvicra mori sërish avantazhin në minutën e 81’ me Dircssi Ngonzo.
Djemtë kuqezi i shkuan shumë pranë në minutën e 90’, por goditja e Përndrecës kaloi ngjitur me shtyllën.
Ndeshja në fund u mbyll me fitoren e Zvicrës U-21 me rezultatin 2-1.
