Milani i Maks Alegrit hyn në një periudhë vendimtare. Dy muajt e ardhshëm do të tregojnë shumë mbi ambiciet e kuqezinjve, të cilët do të përballen me një seri ndeshjesh të forta dhe të ngjeshura. Në total janë nëntë sfida, gjashtë prej tyre direkte me rivalë të mëdhenj: Napoli, Juventusi, Atalanta, Roma, Interi dhe Lacio.
Një kalendar që të ngjall frikë por edhe entuziazëm, sepse pikërisht në këto përballje matet forca dhe karakteri i një skuadre me objektiva madhorë. Gjithçka nis me Milan-Napoli në “San Siro”, për të vijuar më 5 tetor me duelin e ndezur Juve-Milan. Më pas vijnë transfertat e Atalantës dhe Interit, ndërsa në shtëpi priten Roma dhe Lacio, në një seri përplasjesh që mund të ndryshojnë krejtësisht ecurinë e sezonit.
Vetëm tre sfida duken më të lehta në letër: kundër Fiorentinës së Piolit, ndaj Pisas dhe në fushën e Parmës. Por edhe këto ndeshje nuk duhen nënvlerësuar, sepse mund të ndikojnë në moralin dhe renditjen e skuadrës. Alegri, i njohur për qetësinë e tij, përsërit shpesh se “llogaritë bëhen në mars”. Megjithatë, në fund të nëntorit do të kuptohet më qartë ku mund të arrijë ky Milan. Rezultatet e këtij cikli do të tregojnë nëse kuqezinjtë janë gati të luftojnë për titull apo do të kufizohen në synime më modeste.
Pas kësaj serie të zjarrtë, vijnë edhe takime të tjera me peshë. Më 3 dhjetor, në Kupën e Italisë, Milani përballet sërish me Lacion. Ndërsa pak para Krishtlindjeve do të luhet gjysmëfinalja e Superkupës kundër Napolit, një tjetër test i madh për Alegrin dhe lojtarët e tij. Pra, kuqezinjtë kanë përpara një maratonë të vërtetë. Ndeshje të mëdha, emocione të forta dhe shumë përgjegjësi. Alegri e di mirë: për të fituar duhet kaluar nga këto përballje, njëra pas tjetrës, pa frikë e me vendosmëri.
