Sot po zhvillohet mbledhja e Konferencës së Kryetarëve në orën 09:00, ku do të shqyrtohet kërkesa e Partisë Demokratike për mocion me debat mbi programin qeverisës për katër vitet e ardhshme. Kjo kërkesë u dorëzua më 26 shtator nga kreu i grupit parlamentar të PD-së, Gazment Bardhi, pas ngjarjeve në seancën plenare të 18 shtatorit, kur opozita bllokoi prezantimin e programit nga kryeministri Edi Rama, ndërsa socialistët e kaluan për votim programin dhe kabinetin e ri brenda vetëm 25 minutave.
Pas Konferencës së Kryetarëve, nga ora 10:00 nis konstituimi i pesë prej 11 komisioneve parlamentare, të miratuara javën e kaluar nga maxhoranca dhe opozita.
Në orën 10:00 do të konstituohet Komisioni për Evropën dhe Punët e Jashtme, ndërsa në 10:30 nis puna e Komisionit për Çështjet Ligjore dhe Administratën Publike, i cili pritet të miratojë kalendarin trejavor të punimeve për periudhën 29 shtator – 17 tetor 2025, si dhe raportimet vjetore të disa organeve kushtetuese dhe institucioneve ligjore për vitin 2024.
Në orën 11:00 do të konstituohen Komisioni për Bujqësinë, Ushqimin dhe Zhvillimin Rural dhe Komisioni për Shëndetësinë dhe Mirëqenien Sociale, ndërsa në 12:30 do të vijojë konstituimi i Komisionit për Burimet Natyrore, Infrastrukturën dhe Zhvillimin e Qëndrueshëm.
Në seancën e kaluar, opozita dërgoi emrat për anëtarët e komisioneve dhe bashkëpunoi me maxhorancën për miratimin e tyre, duke tejkaluar ngërçin e krijuar rreth ndarjes së vendeve mes maxhorancës dhe opozitës, 7 për të parën dhe 4 për të dytën.
Mbledhja vazhdon të zhvillohet, duke shënuar një ditë të rëndësishme në kalendarin parlamentar shqiptar.
