Shpëtimtarët thonë se 20 persona janë plagosur në jug të Izraelit pasi ushtria izraelite njoftoi se një dron ishte lëshuar nga Jemeni.
Forcat Mbrojtëse të Izraelit (IDF) thanë se droni goditi qytetin turistik Eilat, në bregun e Detit të Kuq, dhe se ishin bërë përpjekje për ta kapur atë në ajër.
Shërbimi emergjent mjekësor Magen David Adom tha se 20 persona u dërguan në Spitalin Yoseftal – dy prej tyre me dëmtime të rënda në gjymtyrë.
Mediet izraelite e përshkruan sulmin si një goditje e Houthive, por grupi jemenas nuk e ka marrë ende zyrtarisht përgjegjësinë.
Stacionet televizive izraelite transmetuan pamje direkte të momentit të sulmit dhe zonës së goditur, ku shihej tym i dendur që ngrihej nga vendi i shpërthimit.
Pamje të postuara në rrjetet sociale – të verifikuara nga BBC – tregojnë një dron në ajër që zhduket pas disa ndërtesave. Pak çaste më vonë, zogjtë shpërndahen në ajër të trembur nga shpërthimi.
“Forcat e IDF-së, së bashku me Policinë e Izraelit, u dërguan në zonën e Eilat pasi morën një raport për një sulm me UAV (dron),” thuhej në deklaratën e IDF-së.
Më tej thuhej se trupat dhe policia ndihmuan në evakuimin e zonës dhe se një helikopter ishte dislokuar për të evakuuar të plagosurit nga vendi i ngjarjes.
Ushtria u kërkoi qytetarëve të qëndrojnë në zona të mbrojtura për 10 minuta, në rast se marrin një alarm.
Më herët, në qytet u dëgjuan sirena alarmi për sulme ajrore.
Nëse sulmi konfirmohet si i kryer nga Houthit, do të ishte një nga më të rëndët e tyre deri më tani për nga numri i të plagosurve.
Në korrik 2024, një person u vra dhe 10 të tjerë u plagosën nga një sulm me dron të Houthive në Tel Aviv, kur një dron goditi një ndërtesë banimi pranë zyrës së degës së ambasadës amerikane.
Eilati, i njohur si destinacion turistik, ka qenë cak i disa sulmeve të tjera me dron kohët e fundit njëra prej të cilave goditi zonën e hoteleve javën e kaluar, sipas autoriteteve izraelite, por pa shkaktuar viktima.
Në fillim të shtatorit, një person u plagos kur një dron i Houthive goditi Aeroportin Ramon, në veri të Eilat.
Grupi rebel Houthi ka nisur raketa dhe dronë drejt Izraelit, duke i përshkruar këto si akte solidariteti me palestinezët në luftën mes Izraelit dhe Hamasit në Gaza.
Houthit gjithashtu kanë sulmuar anije në Detin e Kuq që nga fillimi i luftës në Gaza.
Grupi rebel, i mbështetur nga Irani dhe që e konsideron Izraelin armik, kontrollon kryeqytetin Sana’a dhe veriperëndimin e Jemenit, por nuk është qeveria e njohur ndërkombëtarisht e vendit.
Izraeli ka reaguar duke bombarduar zona të kontrolluara nga Houthit në Jemen, përfshirë portin e Detit të Kuq, Hudaydah.
Në fillim të shtatorit, ministria e shëndetësisë e drejtuar nga Houthit njoftoi se 35 persona u vranë në sulmet ajrore izraelite në Sana’a dhe provincën al-Jawf.
Ndërsa në gusht, grupi deklaroi se Kryeministri i vetëshpallur, Ahmed Ghaleb Nasser al-Rahawi, u vra nga një sulm ajror izraelit.
