Kryetari i Partisë Demokratike, Sali Berisha, komentoi deklaratën e kreut të Komisionit Qëndror të Zgjedhjeve, Ilirjan Celibashi, i cili tha sot se administrimi i procesit të votimit nga jashtë ishte i suksesshëm dhe me integritet.
Kryedemokrati tha se deklaratat e Celibashit janë të orkestruara nga kryeministri Edi Rama dhe përsëriti pretendimin se zgjedhjet e 11 majit ishin farsë.
“Natyrisht këta janë, të gjithë flasin çfarë thotë zyra e Edi Ramës. Këta i marrin të gatshme nga zyra e Ramës dhe i lexojnë. Si Ilirjani, ashtu dhe Bajrami, edhe të gjithë me radhë. Këtu ka vetëm një zyrë shtypi dhe ajo zyrë shtypi është vetëm e Edi Ramës. Nuk ka deklaratë me qesharake. Zgjedhjet ishin një farsë e vërtetë elektorale dhe ne kemi faktuar me qindra mijëra fakte se, në këto zgjedhje u shkelmuan standardet më elementare të zgjedhjeve të drejta, standardet ndërkombëtare dhe ligjet e vendit”,- tha Berisha.
