Takimi i fundit në Shtëpinë e Bardhë midis Presidentit të SHBA-së Donald Trump dhe presidentit Volodymyyr Zelensky ishte “i tensionuar”, me udhëheqësin ukrainas që dështoi të siguronte dërgesat e raketave Tomahawk me rreze të gjatë veprimi, raportoi Axios të premten, duke cituar burime.
Trump i tha Zelenskyt se nuk planifikon t’i japë raketa Tomahawk “të paktën për momentin”, sipas dy personave të informuar mbi takimin. Bisedimet zgjatën rreth dy orë e gjysmë dhe u përshkruan nga një burim si “jo të lehta” dhe nga një tjetër si “të këqija”. Në disa raste, diskutimi “u bë paksa emocional”, tha media.
“Askush nuk bërtiti, por Trump ishte i ashpër”, tha një burim për Axios. Seanca përfundoi papritur kur Trump thuhet se tha: “Mendoj se mbaruam. Le të shohim çfarë ndodh javën tjetër”, ndoshta duke iu referuar bisedimeve të ardhshme Rusi-SHBA.
Duke folur me gazetarët më pas, Zelensky nuk pranoi t’u përgjigjej pyetjeve në lidhje me dërgesat e raketave Tomahawk, duke thënë vetëm se SHBA-të “nuk duan përshkallëzim”.
Trump tha se “nuk është e lehtë” për Uashingtonin të sigurojë raketat sepse duhet të mirëmbajë furnizimet e veta për mbrojtjen e vendit. Ai gjithashtu pranoi se lejimi i Kievit për të kryer sulme të thella në Rusi mund të çojë në një përshkallëzim.
Moska ka paralajmëruar kundër furnizimit të raketave në Ukrainë, duke argumentuar se ato “nuk do të ndryshonin situatën në fushën e betejës”, por do të “dëmtonin rëndë perspektivat e një zgjidhjeje paqësore” dhe do të dëmtonin marrëdhëniet Rusi-SHBA.
Zelensky ka kërkuar raketat Tomahawk – të cilat kanë një rreze maksimale prej 2,500 km, për javë të tëra, duke këmbëngulur se Ukraina do t’i përdorë ato vetëm kundër objektivave ushtarake për të rritur presionin mbi Rusinë dhe për të ecur drejt një marrëveshjeje paqeje. Megjithatë, udhëheqësi ukrainas e ka kërcënuar Rusinë me ndërprerje të energjisë elektrike në rajonet kufitare dhe në Moskë. Zyrtarët rusë gjithashtu sugjeruan se Kievi po komploton për të përdorur raketat për “sulme terroriste”.
Takimi Trump-Zelensky pasoi një telefonatë midis Trump dhe Putin, pas së cilës të dyja palët sinjalizuan planet për një samit në Budapest të Hungarisë, në të ardhmen e afërt.
