Florjan Binaj ka reaguar pas konfirmimit se do të jetë kandidati i mbështetur nga Partia Demokratike, “Shqipëria Bëhet” dhe “Nisma Thurje” për zgjedhjet e pjesshme lokale në Tiranë.
Aktori i njohur do të përballet me Ogerta Manastirliun, kandidaten e Partisë Socialiste. Binaj thekson se kjo garë nuk është për pushtet, por për qytetarët dhe të ardhmen e tyre.
Reagimi i plotë i Florjan Binajt:
“Falenderoj për mbështetjen që i dha kandidimit tim si kandidat i pavarur Partia Demokratike, Shqipëria Bëhet dhe Nisma Thurje. Mbetem i hapur për çdo mbështetje që do të vijë nga forcat opozitare. Dëshiroj mbi të gjitha të falenderoj me mijëra qytetarë të Tiranës, të cilët më kanë inkurajuar këto ditë. Kjo garë është për ju! Unë nuk jam politikan, jam qytetar dhe partia ime jeni JU! Deri më sot kam luftuar padrejtësinë dhe të keqen me humorin dhe artin tim, sot ju ftoj ta luftojmë me votë. Të dënojmë ata që na vodhën dhe bënë humor me ne! Ju ftoj të bëjmë bashkë mendjet dhe zemrat kundër pushtetit që po dhunon jetët dhe të ardhmen e fëmijëve tanë!”
