I dërguari special i Presidentit rus Vladimir Putin, Kirill Dmitriev, tha për CNN se Moska, Uashingtoni dhe Kievi janë “mjaftueshëm afër” arritjes së një zgjidhjeje diplomatike për t’i dhënë fund luftës në Ukrainë.
Nga ana tjetër ai akuzoi Britaninë e Madhe dhe vendet e tjera evropiane se po bëjnë presion mbi Kievin për të bllokuar bisedimet e paqes.
Dmitriev theksoi gjithashtu se pranimi i fundit nga Presidenti ukrainas Volodymyr Zelenskyy i realiteteve të fushëbetejës shënoi “një hap të madh” drejt negociatave.
“Mendoj se Rusia, Shtetet e Bashkuara dhe Ukraina janë në fakt mjaft afër një zgjidhjeje diplomatike. Qëndrimi i tij i mëparshëm ishte që Rusia duhet të largohet plotësisht, kështu që në fakt mendoj se jemi mjaft afër një zgjidhjeje diplomatike që mund të arrihet”, tha Dmitriev.
Dmitriev tha gjithashtu se beson që një takim Trump-Putin do të ndodhë, por “ndoshta në një datë të mëvonshme”.
Trump foli me Putinin javën e kaluar dhe tha se planifikonte ta takonte atë në Budapest brenda disa javëve të ardhshme, por Trump më vonë e anuloi takimin, por tha se mund të zhvillohej një herë tjetër.
“Dialogu Rusi-SHBA do të vazhdojë, por sigurisht që është i mundur vetëm nëse interesat e Rusisë merren parasysh dhe trajtohen me respekt”, tha Dmitriev.
I pyetur në lidhje me zhgënjimet e Trumpit që, ndërsa bisedat e tij telefonike me Putinin janë produktive, Rusia megjithatë vazhdon të godasë objektiva civile, Dmitriev tha se qëndrimi i ushtrisë ruse është se ajo godet vetëm objektiva ushtarake.
Ukraina përballet pothuajse çdo natë me sulme nga dronë dhe raketa ruse që godasin ndërtesa apartamentesh dhe infrastrukturë civile në Kiev dhe qytete të tjera të mëdha larg vijës së frontit. Gjatë orëve të natës një sulm rus me raketa vrau një civil dhe plagosi 10 të tjerë në kryeqytetin ukrainas.
