Organizimi i Kupës së Botës 2022 në Katar solli një ndryshim të madh në historinë e futbollit, për herë të parë turneu u zhvillua gjatë dimrit, për shkak të temperaturave ekstreme të verës në Lindjen e Mesme. Edhe pse në fillim pati reagime të shumta, suksesi i asaj ngjarjeje dhe fuqia financiare e vendeve të Gjirit duket se po e shtyjnë FIFA-n të rimendojë qasjen e saj ndaj datave tradicionale të turneut më të rëndësishëm të futbollit botëror. Presidenti i FIFA-s, Gianni Infantino, gjatë një fjalimi në takimin vjetor të Klubeve Evropiane të Futbollit në Romë, theksoi se organizata është duke shqyrtuar seriozisht mundësinë që Kupat e Botës pas vitit 2030 të mos mbahen më gjatë verës – të paktën jo në vendet ku klima është përvëluese. “Është e qartë se nuk mund të luajmë gjatë verës në disa vende. Mund të na duhet të ndryshojmë kalendarin. Po e diskutojmë këtë, jo vetëm për Kupën e Botës së ardhshme, por në përgjithësi. Edhe në disa vende evropiane, korriku është shumë i nxehtë. Duhet të jemi mendjehapur dhe të shohim se si mund të përshtatemi,” deklaroi Infantino.
Edhe pse ideja është ende në fazë diskutimi, ajo po shihet me gjithnjë e më shumë seriozitet. Sipas një raporti të publikuar nga The Athletic, Kupa e Botës 2034 – e cila pritet të zhvillohet në Arabinë Saudite mund të ndjekë një model të ngjashëm me Katarin. Turneu mund të zhvillohet në dimër, ose madje të shtyhet për në fillim të vitit 2035 për të shmangur përplasjen me muajin e shenjtë të Ramazanit. Në të njëjtin takim, Infantino foli edhe për zhvillimet gjeopolitike, duke përmendur fazën e parë të një procesi paqeje midis Izraelit dhe Hamasit, të promovuar nga ish-presidenti amerikan Donald Trump. Sipas tij, plani përfshin lirimin e pengjeve në këmbim të lirimit të të burgosurve palestinezë dhe një tërheqje të pjesshme të forcave izraelite.
