Kur Jennifer Lawrence eci në tapetin e kuq në Festivalin e Filmit në Romë këtë javë, ajo u shfaq e veshur me një pulovër me jakë V në dy ngjyra dhe një fund të bardhë të lehtë me shtresa. Pulovra e saj e ngrohtë prej trikoje ishte ideale për një mbrëmje tetori, por puristët e veshjeve formale mund të vënë në dyshim nëse ishte e përshtatshme për tapetin e kuq.
Zakonisht, pulovrat nuk lidhen me paraqitjet glamuroze nëpër evente të paktën jo në kujtesën e afërt. Për rreth 15 vitet e fundit, yjet e famshëm janë veshur gjithnjë e më shumë me pompozitet, ndërsa tapetet e kuq janë shndërruar në një mundësi ekonomike për vetë aktorët dhe për stilistët. Sot nuk është e pazakontë që një fustan të zbukuruar të shoqërohet me një aksesor skulpturor në kokë ose me një bisht që shtrihet disa metra pas. Madje, në fillim të këtij viti, organizatorët e Festivalit të Filmit në Kanë ndaluan “veshjet voluminoze, sidomos ato me bishta të gjatë”, pasi “rrjedha e lëvizjes së të ftuarve” po pengohej nga fustanet gjigante. Sigurisht, askush nuk e mori seriozisht këtë rregull.
Megjithatë, ansambli i Lawrence përshtatej në mënyrën e vet (ishte pjesë e koleksionit të parë të grave nga Jonathan Anderson për Dior). Por ajo prapë sfidonte prirjen për ta tepruar duke refuzuar strategjinë e zakonshme për të veshur fustanin më të madh, më të guximshëm, ose, kohët e fundit, më transparentin. Ka një arsye pse fotot nostalgjike të premierave të filmave nga vitet ’90 qarkullojnë kaq shumë në internet: tapetet e kuq atëherë dukeshin më argëtues.
Në një kohë para stilistëve personalë dhe rrjeteve sociale, yjet kishin më shumë liri të visheshin sipas humorit dhe shijes së tyre për të mos përmendur edhe mundësinë për të eksperimentuar pa frikën e komenteve thumbuese në Instagram. Edhe pse veshja e Lawrence ishte direkt nga pasarela, pulovra e saj e lirshme dhe e rehatshme sillte ndër mend një epokë tjetër të modës hollivudiane. Ajo dukej sikur pyeste: a mund të bëhet moda e tapetit të kuq pak më e çlirët?
Zgjedhjet e Lawrence kanë ngritur këtë pyetje edhe më parë për shembull, kur ajo kombinoi një fustan të kuq princeshë të Dior me një palë shapka të zeza në Festivalin e Filmit në Kanë më 2023. Por ajo nuk është e vetmja që sfidon pritshmëritë. Muajin e kaluar, aktorja dhe komediania Megan Stalter bëri bujë duke shkelur traditën e tapetit të kuq në “Emmy Awards 2025”, duke veshur një palë xhinse Levi’s blu dhe një bluzë të bardhë të thjeshtë.
Ka pasur edhe raste të tjera që tregojnë një “rezistencë” ndaj rregullave të tapetit të kuq: Taylor Russell u shfaq në “Fashion Awards” më 2022 me xhinse vintage Levi’s dhe një bolero të bardhë prej gëzofi nga Gucci, ndërsa Kristen Stewart veshi një fustan-pulovër (me shkëlqim, Chanel gjithsesi) në Festivalin e Filmit në Toronto më 2018. Por yjet që duan vërtet të trazojnë status quon e modës duhet të bëjnë deklarata më të mëdha duke qenë qëllimisht më të thjeshtë.
