Pasi paraqiti zyrtarisht dhe publikisht kandidaturën e tij disa ditë më parë, Graham Potter mori detyrën si trajner i ri i Suedisë këtë të hënë. Ai pason Jon Dahl Tomasson, i cili u shkarkua pas humbjeve kundër Zvicrës (0-2) dhe Kosovës (0-1).
Pas katër ndeshjesh, suedezët të fundit në renditje, po hasin vështirësi në Grupin B të kualifikueseve të Kupës së Botës 2026, me vetëm një pikë. Ata nuk do të jenë në gjendje të kapin Zvicrën (vendi i parë, 10 pikë), por prapë mund të kapin Kosovën (vendi i dytë, 7 pikë) në fund të pushimit të ardhshëm ndërkombëtar.
Megjithatë, ata prapë mund të kualifikohen për ‘play-off’-et evropiane si fitues të grupeve të Ligës së Kombeve të fundit.
Në një deklaratë, Federata Suedeze e Futbollit deklaroi se kontrata e Potter do të skadonte në fund të fazës kualifikuese, në mesin e nëntorit, dhe mund të zgjatet për ndeshje të mundshme ‘play-off’.
Nëse ish-trajneri i Chelseat arrin ta dërgojë Suedinë në Kupën e Botës, kontrata e tij do të zgjatet përsëri. Një aventurë e re që po vjen shpejt për ish-trajnerin e West Ham, i cili u shkarkua nga klubi i Premier League më 27 shtator.
E gjitha filloi në Suedi për Potterin
“Jam shumë i nderuar nga ky mision, por edhe jashtëzakonisht i frymëzuar. Suedia ka lojtarë fantastikë që, çdo javë shkëlqejnë në Kampionatet më të mira Botërore”, tha Potter në njoftimin për shtyp të Federatës. Ai do të jetë në stol për ndeshjet kundër Zvicrës (15 nëntor), pastaj për pritjen e Sllovenisë (18 nëntor).
Përpara se të mbërrinte te Brighton ose Chelsea, Potter e nisi karrierën e tij si trajner te Östersunds. Midis viteve 2011 dhe 2018, anglezi e udhëhoqi ekipin nga Divizioni i Katërt Suedez në Divizionin e Parë Suedez, ndërsa fitoi edhe një kupë vendase.
Në vitin 2017, ai fitoi edhe çmimin ‘Trajneri i Vitit’ në Suedi. Ai mund ta vazhdonte dashurinë e tij për futbollin suedez duke kualifikuar Viktor Gyökeres dhe shokët e tij të ekipit për Kupën e Botës të ardhshme.
