Prej 35 vitesh, Kujtim Plangaj merret me bujqësi dhe ruan traditën 300-vjeçare të kultivimit të qepëve të Drishtit.
Më herët, fermeri nga Postriba synonte të futej në rekordet Guiness me një varg qepësh 110 metra, që do të ekspozohej në Urën e Mesit. Pavarësisht se mbeti pezull kjo iniciativë, nuk i ka humbur shpresat.
“Ëndrra vazhdon. Në mos këtë vit, do të realizohet me ndihmën e Zotit vitin tjetër”, thotë shkodrani teksa tregon pak nga procesi i thurjes së vargut.
“Është traditë në zonën tonë vargu. Nuk i fusim nëpër thasë apo arka. Vjen gati 5 kg një varg qepe. Është estetikë dhe bukuri.”
Është i kënaqur me shitjen. Fama që ka marrë në rrjetet sociale e ka ndihmuar të shesë prodhimet online, pa qenë nevoja të dalë në treg si dikur.
“Qepa shkon 100 lekë kg”, thotë Plangaj.
Në këtë sezon vjeshte ka testuar një varietet të ri siç është romaneska. Kjo është sfida e tij e radhës, prezantimi i një produkti që konsumatorët nuk janë familjar.
“Akoma nuk njihet mirë. Kjo hyn tek familja e brokolit dhe lulelakrës. Është e jashtëzakonshme, por nuk kam gjetur treg. Kam dalë dikur me arka në Shkodër dhe largoheshin sikur po i trembja me diçka të dëmshme. Para 5 vitesh, romaneska shitej 400 lekë kg në Tiranë.”
Plangaj është aktiv në Facebook dhe TikTok, ku ndan proceset e punës dhe ka krijuar një komunitet ndjekësish që e mbështesin në blerjen e produkteve të tij. Një prej tyre është vaji i ullirit.
“Vitin e kaluar ka pasur prodhimtari më të kënaqshme ulliri. Këtë vit ka pasur probleme që në fazën e lulëzimit dhe prodhimi ka rënë. Shpresoj mos të rritet çmimi shumë që të jetë i përballueshëm dhe për konsumatorin. E shes si për familjen time.”, thotë mes të tjerash.
