Një miliardë euro është buxheti i parashikuar për Shëndetësinë dhe Mirëqenien sociale në pr.buxhetin e vitit 2026-të, i cili nga java në vijim do të nisë të diskutohet në komisionet parlamentare. Në një tjetër komunikim me ndjekësit, kësaj radhe kryeministri Edi Rama ka dhënë se ku do të shkojë buxheti i parashikuar për Shëndetësinë, ku 15 mln euro do të përdoren për rimbursimin e barnave të pacientëve të Onkologjikut. Për herë të parë, për vajzat dhe gratë që fitojnë betejën me kancerin e gjirit, rikonstruksioni i gjirit do të jetë falas.
“Mu duk e udhës të ndaj me ju pr.buxhetin 2026 me mbi 1 mld euro për shëndetësinë dhe mirëqenin social afro 4% e prodhimit të përgjithshëm kombëtar. Po ndalem te lufta me kancerin dhe nevoja për barnat e shtrenjta që kërkon kjo luftë. Për herë të parë hapim linjë financimi vetëm për këtë nevojë jetike, duke futur 15 mln euro ekstra në shërbim të pacientëve të Onkologjikut. Për herë të parë, shërbimi i rikonstruksionit të gjirit për gratë dhe vajzat që kalojnë kancerin do jepet i plotë për të gjitha dhe falas”, tha Rama.
Kryeministri Edi Rama njoftoi se do ministrja e Shëndetësisë, Evis Sala do të udhëheqë projektin e ngritjes së Institut Kombëtar të Tumoreve.
“Ministrja e Shëndetësisë e shpallur së fundmi ndër 100 gratë më influnete në mjekësinë botërore për çështjen e kancerit, do udhëheqë projektin kombëtar të ngritjes së institut kombëtar të tumoreve për Shqipërinë 2030, që do i bashkohet rrjet ndërkombëtar të instituteve që luftojnë me kancerin”, tha Rama.
Ndërsa renditi disa prej spitaleve të reja që do rikonstruktohen apo ndërtohen gjatë këtij mandati, shefi i qeverisë tha se synimi është që deri në 2030-ën asnjë strukturë shërbimi të mos jetë jashtë standardeve të Bashkimit Europian. Nga rritja e pagave këtë vit do të përfitojnë 4600 mjekë, infermierë dhe farmacistë si dhe 14.200 teknikë dhe laborantë.
“Ndërkohë, 4600 mjekë, infermierë dhe farmacistë si dhe 14.200 teknikë dhe laborantë do të përfitojnë një rritje të re pagash. Çka është edhe një mesazh i qartë për gjeneratën e re të bluzave të bardha, se në Shqipëri qëndrohet dhe punohet me dinjitet dhe se Shqipëria 2030 do të bëhet vendi ku ikja do të jetë thjesht zgjedhje individuale, jo imponim nga pamundësia për të qëndruar dhe punuar këtu.
Me spitalin e ri të Korçës, urgjencën e Durrësit, spitalet bashkiake e të Matit e Tropojës dhe të tjera me radhë akoma, që do të vazhdojnë intensivisht edhe investimet në modernizimin e infrastrukturës spitalore. Me objektivin e qartë dhe të shpallur që në Shqipëri në 2030, asnjë strukturë e shërbimit shëndetësor të mos jetë jashtë standardeve të Bashkimit Europian”, theksoi Rama.
Inteligjenca Artificiale do të integrohet edhe në sektorin e Shëndetësisë, përmes një kompanie që Rama thotë se shteti shqiptar po e krijon me një prej ekselencave të inteligjencës artificiale në shëndetësinë europiane.
“2026-a është edhe viti i hyrjes së inteligjencës artificiale në shërbimin tonë shëndetësor, përmes një kompanie të përbashkët që shteti shqiptar po krijon me një prej ekselencave të inteligjencës artificiale në shëndetësinë europiane, ndërkohë që me financimet e siguruara nga fondet evropiane, ne do të krijojmë ekosistemin digjital të gatshëm për inteligjencën artificiale duke hapur shtigjet e reja të diagnostikimit me imazhe, të analizave parashikuese dhe të ndërveprueshmërisë në rang kombëtar të sistemit shëndetësor digjital, në përputhje me agjendën digjitale të Bashkimit Europian”, tha Rama.
Ndërkohë në 2026-ën pritet të nisë edhe partneriteti mes QSUT-së me spitalin prestigjioz San Raffaele të Milanos.
