Sali Berisha deklaroi se anëtarja e PD, Anila Aliaj, nuk është përjashtuar nga partia pas debatit të ashpër me Flamur Nokën. Edhe pse Aliaj në një postim në rrjetet sociale u shpreh se ishte larguar, Berisha mohoi këtë, duke theksuar se Partia Demokratike është një forcë e hapur.
Më tej Berisha tha se Aliaj ka rrugën e hapur për ankesë ndaj padrejtësisë që mund të pretendojë se i është bërë.
“Ajo zonja që foli me Nokën nuk është larguar nga partia, askush nuk mund të largojë asnjë anëtar apo simpatizant se i tha këto Berishës apo Nokës.
Kjo nuk ekziston në këtë parti, zonja nuk mund të përjashtohet nga partia. Në rastin ekstrem se ndodhi, ta supozojmë, zonja ka rrugën të hapur për ankesën ndaj padrejtësisë që mund të pretendojë se i është bërë.
Ajo zgjodhi mediat, bëri një zgjedhje të saj, por në dijeninë time ajo nuk është përjashtuar, nuk ka asnjë vendim të asnjë forumi. Ne jemi PD e mendimit të lirë”, u shpreh kreu i PD.
