Ukraina po përballet me një skandal të madh korrupsioni që ka përfshirë figura të larta pranë presidentit Volodymyr Zelensky.
Sot, agjencitë anti-korrupsion të vendit kanë nisur bastisjen e apartamentit të shefit të stafit të presidentit, Andriy Yermak.
Agjencia anti-korrupsion Nabu konfirmoi se bastisjet ishin autorizuar dhe se detaje të mëtejshme do të shpallen së shpejti. Yermak, 54 vjeç, ka luajtur një rol kyç në përgjigjen e Ukrainës ndaj luftës së plotë të Rusisë dhe është negociatori kryesor i Kievit në bisedimet e paqes me SHBA-në. Ai tha se po bashkëpunon plotësisht me hetuesit dhe se avokatët e tij janë prezent gjatë bastisjeve.
Skandali i korrupsionit ka tronditur Ukrainën këtë muaj, me disa zyrtarë të lartë të lidhur me një mashtrim prej rreth 100 milionë dollarësh në sektorin e energjisë. Hetimet tregojnë një skemë të gjerë marrjeje ryshfetesh dhe ndikimi mbi kompanitë shtetërore, përfshirë firmën bërthamore shtetërore Enerhoatom.
Shumë persona janë akuzuar, disa ministra janë shkarkuar, dhe disa të dyshuar janë arrestuar, ndërsa një nga bashkëpunëtorët e mëparshëm të Zelenskyt, Timur Mindich, është arratisur nga vendi. Publiku është indinjuar pasi paratë e përfshira në këtë skandal ishin parashikuar për projekte thelbësore për sigurinë e energjisë në Ukrainë, e cila është goditur rëndë nga sulmet ruse.
Bastisja e apartamentit të Yermak ndodh në një moment të ndërlikuar, teksa sekretari amerikan i ushtrisë, Dan Driscoll, pritet të vizitojë Kievin, ndërsa SHBA-ja përparon me një plan drafti paqeje dhe zyrtarët amerikanë do të udhëtojnë në Moskë javën e ardhshme.
Yermak theksoi se Ukraina nuk do të heqë dorë nga territori si pjesë e negociatave, duke u shprehur: “Sa kohë që Zelensky është president, askush nuk duhet të llogarisë që ne do të dorëzojmë territor.”
