Shkova me pritmëri të ulta të shihja filmin ‘Kazerma’, të prodhuar nga Turjan Hysko – filma të mëparshëm shqiptarë më kanë zhgënjyer në rrafsh krahasimor me filma të shumtë të huaj që kam parë. Por u befasova nga niveli i lartë i Kazermës (krahasuar me filma të tjerë shqiptarë).
Duke e ditur paraprakisht që ‘Kazerma’ është një dramedi (ndërthurje e dramës me komedinë), nuk prisja ndonjë realizim të arrirë, ngaqë ky zhanër është ndoshta me i vështiri në kinematografi. Por si skenari (truri), edhe regjia (zemra) e filmit, kishin arritur të krijonin një film që edhe të bën të mendohesh, edhe të argëtohesh.
Duke ndërthur në skenar si fasadën, edhe prapaskenat e një reality show të tipit ‘Big Brother’, filmi futet thellë në problemet sociale që përjeton aktualisht Shqipëria. Është edhe informativ, edhe argëtues. Dy orët e filmit kalojnë sikur i jeton live ato…
Tek dialogjet vuajnë të gjithë filmat shqiptarë – edhe ‘Kazerma i kishte dy dialogje që tingëllonin si teatralë, por në tërsëi ishte një produksion me tipare hollivudiane. Ndoshta ky film mund të jetë kandidat për ta përfaqësuar Shqipërinë në garën ‘Oscar” për filmat në gjuhë të huaj…
