Duke folur para Këshillit të mbetur Kombëtar në PD, Berisha po shpjegonte sot disa ngjarje të pretenduara kriminale me pengmarrje nga qeveria, që të gjitha përfundonin në “qelitë e Suel Çelës”. Pastaj shtoheshin elementë torture, thyerje brinjësh etj., dhe theksohej Suel Çela.
Sa herë që vizitonte një ngjarje kriminale, duke thirrur në ndihmë gjithë fantazinë e qytetarit digjital, vazhdonte përsëri dhe e mbyllte me Suel Çelën dhe për një moment ishte gati të thoshte: E shikoni pra se kush ia bën mitingjet Ervin Salianjit? Ja ky Suel Çela.
Nuk di nëse ka në dosjen e SPAK ndonjë pengmarrje biznesmeni apo zyrtari nga Suel Çela, por mund të ketë presione mes palëve në tendera, që është fenomen për biznesin shqiptar në raport me tenderat publikë.
Po Berishës i duhej ta fuste sot si personazh në Këshillin Kombëtar jo për ngjarjet e pretenduara të tij, por për Ervin Salianjin.
Ka më shumë se një javë që në PD ka shpërthyer një debat i madh se i kujt është Suel Çela brenda PD. Gazmend Bardhi ka pasur pretendime që është i Flamur Nokës dhe Sali Berishës, se i ka ndihmuar ata të bëjnë Kuvendin kundër Lulzim Bashës më 2021. Pastaj të gjithë personazhet e PD-së, sa herë zihen me njëri-tjetrin, akuzojnë njëri-tjetrin se janë të Suel Çelës. Së fundmi armiku i radhës i partisë, natyrisht që nuk do të shpëtonte nga të qenit mik me Suel Çelën.
Pra, në PD fantazia për të luftuar njëri-tjetrin ka rënë në nivelin e fantazisë për të justifikuar humbjen 10 me 4 më 11 Maj, ku edhe aty e kishte fajin Suel Çela. Pra, kur humbasin thellë e ka fajin Suel Çela, kur zihen me njëri-tjetrin e ka fajin Suel Çela, kur u duhet vula kërkojnë ndihmë tek Suel Çela, kur u dalin kundër vulës e ka fajin Suel Çela.
Krijimi i mitit të një krimineli që komandon PD-në dhe menaxhon sherret brenda tyre, dhe po ashtu i siguron PD-së një alibi sa herë humbet, është një dëshmi e degradimit të një partie politike, e cila për të mos ndryshuar vetë, krijon mitin e një të dënuari ordiner si faktor politik brenda opozitës dhe kundër opozitës, siç i duhet Sali Berishës.
Kur humbet zgjedhje, i duhet si alibi që i ka humbur nga Suel Çela; kur humbet vulën, thërret Suel Çelën; kur ia kërkojnë vulën, fajëson Suel Çelën, e kështu me radhë.
Kaq i rëndësishëm sa shfaqet Suel Çela për PD-në, ai qenka kryetari real i saj. Ai i ndan kur zihen, i pajton, apo i fut në sherr me njëri-tjetrin. Dhe e gjithë kjo që Berisha të justifikojë pse e ka çuar PD-në në gropë, pse nuk i lë demokratët të debatojnë me zë të lartë problemet e tyre, dhe mbi të gjitha pse dikush i kërkon atij karrigen e PD-së.
Kështu Sali Berisha e ka çuar të ardhmen e PD-së në një situatë parapolitike, ku ata duhet të debatojnë se si të bëhen aleatë apo armiq të Suel Çelës.
Pak nga pak këta po kthehen nga parti politike në një bandë të copëzuar në raport me Suel Çelën. Kushdo që ta fitojë dashurinë e Suel Çelës, ka të siguruar vendin në krye të bandës. Dhe meqë Ervin Salianji po vepron pa leje, po e kërcënojnë se do ta përjashtojnë nga banda, pasi “po u merr Suel Çelën”.
Dhe gjithë këtë nuk e bëjnë se duan ta përjashtojnë vërtet, se në një parti politike e ke vetë në dorë të përjashtohesh nëse nuk ke më punë aty. E bëjnë sepse duan të turpërojnë demokratët që e ndjekin pas, duke i njollosur si ushtarë të një të dënuari ordiner.
Dhe vetëm për kaq e kanë kthyer Suel Çelën në një mit që ka në dorë fatin e PD-së. Me kë është ai, është fitorja.
Si nuk u vjen zor nga ajo deputeja Çapja, që e ka armik real!
Suel Çela është sot një mit në dispozicion të Berishës, për të justifkuar humbjet elektrale, dhe armiqtë brenda partisë.
Dhe pastaj thotë që në datën 22 dhjetor do të fillojmë betejën kundër krimit./Tema
