Presidenti ukrainas Volodymyr Zelensky u ka kërkuar aleatëve evropianë të tregojnë mbështetjen e tyre për Kievin dhe t’i dërgojnë një sinjal të qartë Moskës se vazhdimi i luftës së saj është “i pakuptimtë”.
Në fjalimin e tij të mbrëmjes, të publikuar në Telegram dhe në faqen e tij të internetit, Zelensky tha se Moska vazhdon të dërgojë sinjale se po përgatitet për konfrontim të mëtejshëm dhe “është e rëndësishme që partnerët ta shohin këtë, në veçanti partnerët në SHBA, të cilët shpesh thonë se Rusia supozohet se dëshiron t’i japë fund luftës”.
“Ne kemi nevojë për mbrojtje të vërtetë nga kjo histori çmendurie dhe tani do të vazhdojmë të punojmë me të gjithë partnerët për të siguruar që një mbrojtje e tillë të jetë vërtet aty.
Rezultati i këtyre takimeve, rezultati për Evropën, duhet të jetë i tillë që Rusia të ndiejë se dëshira e saj për të vazhduar luftën vitin e ardhshëm do të jetë e pakuptimtë, sepse Ukraina do të vazhdojë të ketë mbështetje”, tha Zelensky.
Ai tha se ky rezultati varej “100%” nga vendimi i Evropës dhe “i takon Evropës ta bëjë këtë zgjedhje”.
“Gjithashtu presim që përfaqësuesit tanë këtë javë të vazhdojnë bisedën dhe takimet me ekipin amerikan rreth hapave që mund të funksionojnë për paqen dhe sigurinë e garantuar”, shtoi ai.
