Irani po planifikon një shkëputje të përhershme nga interneti global, duke e kthyer aksesin në rrjetin ndërkombëtar në një privilegj të rezervuar vetëm për individë të miratuar nga regjimi.
Mediat ndërkombëtare raportojnë se pjesa më e madhe e popullsisë iraniane do të kufizohet në përdorimin e një rrjeti kombëtar të mbyllur, të shkëputur nga pjesa tjetër e botës. Ndërkohë, vetëm qytetarët me autorizime sigurie ose që kanë kaluar kontrolle specifike qeveritare do të mund të lidhen me një version të filtruar të internetit global.
Një raport i organizatës Filterwatch, e cila monitoron censurën online në Iran, flet për një “plan të rezervuar për ta shndërruar aksesin në internetin ndërkombëtar në një privilegj shtetëror”. Burime të brendshme të cituara nga raporti pohojnë se media shtetërore dhe zyrtarë qeveritarë e kanë paraqitur këtë strategji si një ndryshim strukturor dhe përfundimtar.
Autoritetet iraniane kanë paralajmëruar se aksesi i lirë në internet nuk do të rikthehet pas vitit 2026. Amir Rashidi, drejtues i Filterwatch, shpjegon se modeli i ri do të krijojë një ndarje të qartë digjitale, një elitë me akses të kontrolluar në rrjetin global dhe shumica e qytetarëve të kufizuar në të ashtuquajturin “internet kombëtar”, një rrjet paralel vendas pa lidhje me botën e jashtme.
Zhvillimi i ri ngre shqetësime serioze për lirinë e shprehjes, qarkullimin e informacionit dhe të drejtat digjitale në Iran, në një kontekst ku censura online është tashmë e përhapur.
