Zohran Mamdani, kryebashkiaku i ri i Nju Jorkut, ka telefonuar presidentin Donald Trump të shtunën për t’i shprehur personalisht kundërshtimin e tij ndaj sulmeve të kryera nga Shtetet e Bashkuara në Venezuelë dhe ndaj kapjes së liderit të saj, Nicolás Maduro.
“E telefonova presidentin dhe fola drejtpërdrejt me të për të shprehur kundërshtimin tim ndaj këtij veprimi”, deklaroi Mamdani gjatë një konference për shtyp mbi një çështje tjetër, duke shtuar se i kishte thënë Trumpit se ishte “kundër një përpjekjeje për ndryshim regjimi dhe kundër shkeljes së së drejtës federale dhe ndërkombëtare”.
Kryebashkiaku refuzoi të komentojë mbi përgjigjen e presidentit, pavarësisht këmbënguljes së gazetarëve. Bashkëpunëtorët e tij thanë se Mamdani e kishte bërë telefonatën në orët e para të pasdites së së shtunës dhe se biseda kishte qenë “e shkurtër”.
“Shpreha kundërshtimin tim, e bëra të qartë dhe çështja u mbyll aty”, u shpreh Mamdani.
Të paktën 40 persona, mes tyre civilë dhe ushtarë, janë vrarë në sulmin amerikan të së shtunës në Venezuelë. Vlerësimi vjen nga një zyrtar i lartë venezuelian, i cili ka folur në kushte anonimiteti për New York Times.
Mes viktimave përfshihet edhe një grua me emrin Rosa González, e cila u vra në apartamentin e saj që u godit nga sulmi. Një tjetër banor raportohet se ka mbetur rëndë i plagosur.
Donald Trump, duke folur të shtunën për Fox News, deklaroi se asnjë ushtar amerikan nuk është vrarë. Megjithatë, ai la të kuptohet se disa ushtarakë kanë mbetur të plagosur.
Më pas, gjenerali Dan Caine, shefi i Shtabit të Përbashkët, deklaroi gjatë një konference për shtyp në Mar-a-Lago, në prani të presidentit Trump, se një nga helikopterët amerikanë të përfshirë në operacionin për kapjen e presidentit Nicolás Maduro dhe bashkëshortes së tij ishte goditur, por “ishte ende në gjendje të fluturonte”, dhe se të gjitha mjetet ajrore amerikane janë kthyer në bazë.
Gjykata Supreme e Drejtësisë e Venezuelës ka urdhëruar që Zëvendëspresidentja Ekzekutive Delcy Rodríguez të marrë detyrën e presidentes së përkohshme të vendit jugamerikan, pas kapjes së Presidentit Nicolás Maduro nga Shtetet e Bashkuara.
“Urdhërohet që qytetarja Delcy Eloína Rodríguez Gómez, Zëvendëspresidente Ekzekutive e Republikës, të marrë dhe të ushtrojë, si Presidente e përkohshme, të gjitha fuqitë, detyrat dhe kompetencat që lidhen me postin e Presidentit të Republikës Bolivariane të Venezuelës, me qëllim garantimin e vazhdimësisë administrative dhe mbrojtjes së plotë të kombit,” deklaroi Presidentja e Dhomës Kushtetuese, Tania D’Amelio, duke lexuar një deklaratë të transmetuar në radio dhe televizion.
