Media britanike The Telegraph, ka publikuar një artikull për një kriminel shqiptar i cili teksa i shmanget deportimit në Shqipëri, feston në klubet e Anglisë. The Telegraph shkruan se, një kriminel shqiptar ka organizuar një festë me shampanjë për të festuar qëndrimin e tij ende në Britani, 10 vjet pasi iu urdhërua të largohej.
Dorian Puka, 29 vjeç, i cili është burgosur dhe deportuar dy herë për vjedhje me thyerje përpara se të kthehej fshehurazi në vend , e shënoi këtë moment historik me një festë VIP në një klub, i rrethuar nga valltare dhe shampanjë me vlerë mijëra paund. Puka, një shqiptar me precedentë penal në Britaninë e Madhe, ka përdorur rrjetet sociale për të sfiduar hapur autoritetet britanike ku shfaqen makina luksoze si Ferrari dhe Lamborghini, si dhe koleksione orësh Rolex.
Gazeta tregon se si nisi historia e Pukës në vitin 2015, kur u dënua për vjedhje banesash. Edhe pse u deportua dy herë, ai arriti të rikthehej sërish duke kaluar ilegalisht kufijtë e Evropës. Puka u kap përfundimisht nga oficerë të veshur civilë që patrullonin Surbiton, gjithashtu në jugperëndim të kryeqytetit, pasi ishte raportuar një rritje e vjedhjeve lokale. Ai mbante një orë të shtrenjtë që e kishte vjedhur.
Ai u burgos për tre vjet e gjysmë dhe më pas u deportua në mars të vitit 2020. Gjatë qëndrimit në burg, ai fitoi famë duke postuar foto nga qelia me krerë të krimit të organizuar. Ndërkohë, Ministria e Brendshme pranon se është ligjërisht e pafuqishme për ta dëbuar derisa të shqyrtohet kërkesa e tij për azil, pavarësisht paralajmërimeve për reforma të rrepta në sistemin e imigracionit dhe dëbimin e kriminelëve të huaj.
